तेह्रथुम । जिल्ला अदालत तेह्रथुमले गोरु काटेर खाएको आरोपमा पक्राउ परेका दुईजनालाई पुर्पक्षका लागि कारागार चलान गरेको छ ।
लालीगुराँस नगरपालिका–५ दाँगपाका २८ वर्षीय प्रेमछिरि शेर्पा र छथर गाउँपालिका–६ सुदापका ४२ वर्षीय फुर्तुङ शेर्पालाई तत्कालका लागि कारागार चलान गरिएको हो ।
जिल्ला न्यायाधीश नारायणप्रसाद पराजुलीको अनुपस्थितिमा श्रेस्तेदार अम्बिकाप्रसाद दाहालले उनीहरुलाई कारागार चलान गरेका हुन् ।
आरोपितद्वयलाई प्रहरीले बडादसैंको फूलपातीको दिन लालीगुराँस नगरपालिका–५ दाँगपास्थित ढुंगेको जंगलमा गोरु काटेर घरमा लगी खाएको आरोपमा पक्राउ गरेको थियो ।
गोरु काट्ने मुख्य व्यक्ति मानिएका २५ वर्षीय पासाङ शेर्पा भने फरार रहेको प्रहरीले जनाएको छ ।
