पानवारी । धरान–१८ स्थित होटल कान्तिपुरमा मृत फेला परेकी युवतीसँगै रहेका युवक पक्राउ परेका छन् । शुक्रबार दिउँसो होटल कान्तिपुरमा मृत अवस्थामा फेला परेकी युवतीसँग बसेका युवक धरान–१ का रोनिश श्रेष्ठलाई शनिबार बिहान ३ बजेको समयमा तिनकुनेबाट प्रहरीले पक्राउ गरेको हो । उनी ट्रक चढेर धरानबाट भाग्दै गरेको अवस्थामा पक्राउ परेका हुन् । उनीसँगै रहेका अर्का युवालाई समेत प्रहरीले नियन्त्रणमा लिएको इलाका प्रहरी कार्यालय धरानका डिएसपी सुमनकुमार तिम्सिनाले बताए । धरान–१९ की २८ वर्षिय रिता राई शुक्रबार दिउँसो करिब साढे ३ बजेको समयमा होटलको एक कोठामा मृत फेला परेकी थिइन् । मृतकको परिवारजनले जाहेरी दर्ता गराएर घटनाको अनुसन्धान गरी सत्यतथ्य पत्ता लगाउन माग गरेकाछन् । मृत्युको कारण भने शव पोष्टमार्टम रिपोर्ट र विज्ञको अनुसन्धानपछि मात्र पत्ता लाग्ने डिएसपी तिम्सिनाले जनाएका छन् । विपि कोइराला स्वास्थ्य विज्ञान प्रतिष्ठान धरानमा शव राखिएको छ भने मृत्युको कारणबारे अनुसन्धान भइहरेको प्रहरीले बताएको छ ।
