टोकियो/ जापानको क्योटो शहरमा रहेको एक भवनमा रहेको एनिमेसन स्टुडियोमा बिहीबार गरिएको संदिग्ध आगजनीमा परी कम्तीमा २४ जनाको मृत्यु हुनुको साथै अन्य दर्जनौँ घाइते भएका छन् ।
सो कम्पनीमा भएको भीषण आगआगी योजनाबद्ध रूपमा गरिएको प्रहरीको भनाइ रहेको छ । यस आगजनीको पछाडि कुन कारण रहेको हो, सो भने प्रष्ट नभएको प्रहरीले जानकारी दिएको छ । सो आगजनीको समयमा भवनमा कार्यरत धेरै व्यक्ति भाग्न असफल भएकाले मृतकको सङ्ख्या बढ्ने आशङ्का गरिएको अधिकारीले जानकारी दिएका छन् ।
भूइँ तला र पहिलो तलामा १२ जनालाई गम्भीर अवस्थामा उद्धार गरिएको र उनीहरूमा श्वासप्रश्वासको समस्या देखिएको अग्नि नियन्त्रण विभागमा अधिकारीले एएफपी समाचार समितिलाई जानकारी दिएका छन् । सो आगजनीमा मारिएका प्रायः व्यक्ति सो कम्पनीमा कार्यरत रहेका बताइएको छ । यद्यपि यसमा घटनामा मारिएका व्यक्तिको औपचारिक पुष्टि भने भएको छैन ।
दोस्रो तलामा रहेका व्यक्ति पनि भाग्न असफल भएको बताइएको छ । सरकारी अधिकारीका अनुसार यस आगजनीमा परी ३५ व्यक्ति घाइते भएका र तीमध्ये १० जनाको अवस्था चिन्ताजनक रहेको छ । कम्पनीमा करिब ७० जना कार्यरत रहेको बताइएको छ ।
प्रहरीले एक शङ्कास्पद अधवैंशे व्यक्तिलाई घाइते अवस्थामा नियन्त्रणमा लिएको छ । उनको स्थानीय अस्पतालमा प्रहरीको निगरानीमा उपचार भइरहेको छ । ती व्यक्तिले पेट्रोलजस्तो देखिने तरल पदार्थ लिएर भवनभित्र प्रवेश गरेको सिसिटिभी फुटेजमा देखिएको छ । उनले नै भवनको तल्लो तलामा पेट्रोल छर्केर आगो लगाएको आशङ्का प्रहरीले गरेको छ ।
