तेह्रथुम । म्याङलुङ नगरपालिका १० तम्फुलामा रहेको शारदा आधारभुत विद्यालयका विद्यार्थीको पढाई पिउने पानी अभावमा प्रभावित हुने गरेको छ । गाउँ हुदै विद्यालय सम्म ल्याएको पानी नियमित नहुदा विद्यार्थीले पिउने पानीको समस्या झेल्दै आएका हुन् ।
टिफिनका लागि केही समय छोडेका विद्यार्थी पिउने पानी खोज्दै गाउँ पस्ने र फर्किएर आउदा ढिला गरी आउने भएकाले त्यस पछिको पढाई समय प्रभावित हुने गरेको उनले वताए । सानो पाईपबाट गाउँसम्म ल्याएको पानी पनि प्रयाप्त नभएकाले गाउँमा समेत पिउने पानीको समस्या छ । थोरै समय आएको पानी ५ सय लिटर क्षमताको हिलट्याङकमा जम्मा गरेर विद्यालय भवन भित्र सानो कोठामा चावी लगाएर राखीएको छ । ५ सय लिटर क्षमताको उक्त हिलट्याङक अहिले सम्म भरीन पाएको छैन् ।
विहान जम्मा भएको २ सय लिटर जती पानीले आधा विद्यार्थीलाई पनि पुग्दैन् । साना विद्यार्थीलाई पालोमा राखेर पानी पिउन दिदा दिदै सकिने गरेको र ठुला विद्यार्थीलाई कहिले पनि पानी नपुग्ने गरेको शिक्षक ईन्दु सुवेदीले बताईन् । चावी लगाएर राखेको पानीले नपुगेपछि ठुला विद्यार्थी जती नजीकको गाउँतर्फ लाग्छन् । गाउँमा पनि प्रयाप्त पानी नभएकाले कहिले कांंही आधा घण्टा टाढा सम्म पिउने पानी दिने घर खोज्दै पुग्नु पर्ने छात्रा रस्मी पौडेलले वताईन् । गाउँमा गएर पानी पिएर आउदा पढाई शुरु भएर धेरै पटक घण्टी नै छुटेको उनले दुखेसो पोखीन् । विहान सिमित समय आउने पानीलाई अरुले चोरेर लाने डरले हिलट्याङकमा जम्मा गरेर कोठामा चावी लगाएर थुनेर राख्ने गरीएको विद्यालय प्रशासनले जनाएको छ । ‘पानी चोरी भए विद्यार्थीलाई खुवाउन सकिन्दैन्’ प्रअ गुरागाईले भने ‘जती पानी आउछ त्यसलाई जोगाएर राख्ने हो ।’
विद्यालयले विद्यार्थीलाई पिउनेपानीको जोहो गर्नकै लागि प्रत्येक दिन अपरान्ह ४५ मिनेट छुट्टी दिन्छ । एकै पटक धेरै विद्यार्थी पानी खोज्दै गाउँ पस्ने भएकाले गाउँले अभिभावकलाई पनि यी विद्यार्थी समस्या वनेका छन् । मुस्कीलले जोहो गरेको पानी सवै विद्यार्थीले पिईदिने गरेकाले विहान वेलुका खाना पकाउन समेत पानी अभाव हुने गरेको अभिभावक चक्र खड्काले वताए । पानी माग्दै विद्यार्थी गाउँभरी छरीने गरेको उनले वताए । विद्यालय समय भन्दा अघि विहान केही समय मात्र पानी आउने र विद्यालय समयमा पानी नआउने गरेको विद्यालयले जनाएको छ । विद्यालय आसपास पानीका मुहान र धारा कुवा नभएकाले अभिभावक र विद्यार्थी सवैलाई यो गाउँमा पानीको समस्या भएको विद्यालय व्यवस्थापन समिति अध्यक्ष फौद सुवेदीले वताए । टाढाबाट स्थायी रुपमा विद्यालयमा पानी ल्याउन साविक नगरपालिका, खानेपानी तथा सरसफाई सवडिभिजन कार्यालय लगायतका सरकारी तथा अन्य गैरसरकारी संघ संस्था संग हारगुहार गर्दा पनि सुनुवाई नभएको अध्यक्ष सुवेदीले वताए ।
कक्षा ८ सम्म पढाई हुने यो विद्यालयमा ६० जना विद्यार्थी छन् । शिक्षक सुवेदीका अनुसार ०११ सालमा स्थापना भएको यो विद्यालयले ०३९ साल देखी निरन्तर पिउने पानीको समस्या झेल्दै आएको छ । पानी पिउन गाउँ पसेका अधिकाशं विद्यार्थी टिफिनको समय पछि फर्किएर नआउने गरेकाले त्यस पछिका घण्टीमा सवै कक्षामा विद्यार्थी संख्या घट्दै जाने गरेको शिक्षकको गुनासो छ । पहिले गाउँमा रहेका कुवा तथा मुलहरु सुकेर गएकाले पानीको हाहाकार भएको शिक्षक सुवेदीले वताईन् । पिउने पानीकै अभाव भएपछि गाउँका पुन्य पैसाद रेग्मी, कमल कार्की, महेन्द्र डांगी, राम प्रसाद गुरागाई पुर्वी तराई तर्फ वसाई गैसकेका छन् । वडा नं. ४ का चन्द्र वहादुर सुवेदी, हर्क वहादुर सुवेदी, नरेश थापा, डिल्ली प्रसाद गुरागाई, नन्द वहादुर भण्डारी लगायतका गाउँले पनि वसाई जाने तयारीमा छन् । पानी अभावमा गाउँलेहरु आफ्नो उर्भर जमिनमा वर्षको एक वाली मात्र कमाई लगाउछन् ।
