‘पिण्डेश्वर देवताकै पालादेखिको हो’

alt
  • श्रावण ३, २०७६
  • ७६३ पटक पढिएको
  • डम्बर कार्की

साउनको महिना शुरु भएसँगै शिव मन्दिरहरूमा चहल–पहल बढ्ने गर्दछ । साउन महिनामा शिवलाई जल अर्पण गरे मोक्ष प्राप्ति हुने जनविश्वास रहिआएको छ । धरानको पिण्डेश्वर बाबाधाममा पनि २०३९ सालदेखि जल चढाउँदै आइएको छ । साउन महिनामा मात्र यहाँ ४ देखि ५ लाख भक्तजनले जल अर्पण गर्छन् । झापा, मोरङ, सुनसरी, उदयपुरसहित भारत विहार, बङ्गाल सिक्किमबाट भक्तजन जल चढाउनका लागि आइपुग्छन् । भक्तजनको चापलाई सुगम बनाउन पिण्डेश्वर बाबाधाम समितिले हरेक वर्ष उचित व्यवस्थापन गर्दै आएको छ । यसै विषयमा पिण्डेश्वर बाबाधाम समितिका अध्यक्ष विकासकुमार बनेपालीसँग ब्लाष्टले गरेको कुराकानीको सम्पादित अंशः

– बोलबमको महिना आयो, तयारी कस्तो भइरहेको छ ?
तयारीहरू लगभग पूरा भएका छन् । तयारी स्वरूप नै प्रदेश १ का सभामुख प्रदीपकुमार भण्डारीले साउन १ गते नै जल अर्पण गर्दै विधिवत् शुभारम्भ पनि गरिसक्नुभएको छ । जल अर्पण कार्यक्रममा हामीले प्रदेश १ का उच्च पदस्थ व्यक्तिहरूलाई, स्थानीय तहका प्रमुख तथा उप–प्रमुखहरूलाई पनि बोलाएका थियौं । जसले गर्दा स्थानीय स्तरमा प्रचारप्रसारमा पनि सहयोग पुगेको छ । भक्तालुलाई आकर्षित गर्न साउन १५ गतेदेखि २१ गतेसम्म सरस्वती सरोवरमा सन्ध्याकालीन महाआरती पनि गर्दै छौँ ।

– भक्तजनहरूलाई चाहिँ कसरी आमन्त्रित गर्दै हुनुहुन्छ ?
साउन महिना शुरु हुनुअगावैदेखि पिण्डेश्वर मन्दिरका बारेमा र बोलबमको समयमा हुने गतिविधिहरूका बारेमा जानकारी गराउँदै आएका छौं । पत्रकार सम्मेलन गरेर पनि जानकारी गराएका छौं । त्यस्तै प्रचार–प्रसार अझ प्रभावकारी बनाउन उदयपुर, सप्तरी, मोरङ, झापा, इलामलगायतका विभिन्न जिल्लाका स्थानीय तह र गाउँहरूमा माइकिङ, पोष्टर, पम्प्लेटिङ गरेका छौं ।

– यसअघिको अभ्यासका आधारमा कति भक्तजन आउलान् त ?
पुरानो रेकर्डअनुसार विषेश गरी झापा, मोरङबाट अलि बढी भक्तजनहरू आउने गरेको पाइएको छ । भारतको सीमा क्षेत्र विहार, सिक्किम र बङ्गालबाट पनि भक्तजन आउने गर्नुहुन्छ । त्यस्तै प्रदेश एक र प्रदेश दुईका अलवा पश्चिमका जिल्लाहरूबाट पनि आउने गर्नुभएको छ । यसवर्षको बोलबममा एक महिनाभरि चारदेखि पाँच लाख भक्तजनहरू आउने अनुमान गरेका छौँ ।

– यतिका धेरै भक्तजन आउँछन्, अनि व्यवस्थापनको काम चाहिँ कसरी गरिरहनु भएको छ ?
भक्तजनहरू धेरै बेर लाइनमा बस्न नपरोस् भनेर आइतबार सात बजेदेखि २४ सै घण्टा खोल्ने व्यवस्था गरेका छौँ, जसले गर्दा भक्तजनहरू धेरैबेर लाइनमा बस्न पर्ने छैन । ज्येष्ठ नागरिक, बालबालिका र बिरामीलाई विषेश व्यवस्था गरेर दर्शन गराउने सोचमा छौँ । साउन महिना वर्षात् हुने भएकाले वहाँहरूलाई लाइनमै ओत लाग्ने गरी ६०–४८ को अस्थाइ ट्रष्ट निर्माण गरेका छौँ । प्राथमिक उपचारका लागि नेपाल परिवार नियोजन सङ्घ, रोट्¥याक्ट क्लब अफ घोपा र विजयपुर हस्पिटल प्रालिले सहयोग गरिरहेका छन् । आकस्मिक बिरामी भएको अवस्थामा प्रत्येक सोमबार एम्बुलेन्सको पनि व्यवस्था गरेका छौँ । यदि अस्पताल लाने अवस्था आयो, तर बिरामीसँग उपचार खर्च नभएमा समितिले नै आफ्नो पैसा खर्च गरेर भए पनि त्यस्ता बिरामीको उपचार गरिदिने छ । दाताहरूले एयर कुलर प्रदान गर्नुभएको छ । गर्मी भएको खण्डमा भक्तजनलाई सहज होस् भनेर मन्दिर परिसरमा त्यो पनि राख्ने व्यवस्था गरेका छौँ ।

– बोलबमका लागि अन्य क्षेत्र पनि छन्, यहाँ नै आउनु पर्ने त्यस्तो केही कारण छ ?
पिण्डेश्वर बाबाधाम पौराणिक कालदेखि कै हो । यो कुनै व्यक्तिविशेषले निर्माण गरेको मन्दिर होइन । यो परापूर्व कालमा समुद्र मन्थन गर्दा विभिन्न वस्तुहरू निस्किएको र ती वस्तुहरूलाई छानेर अमृत निकालिएको र देवताहरूलाई भगवान शिवले मोहिनी रूपधारण गरी पिलाएको स्कन्दपुराणमा उल्लेख छ । अमृत निकाली सकेपछि निस्केको विकार वस्तु (छोक्रा) लाई यहाँ पिण्ड स्थापन गरी देवताहरूकै पालामा पिण्ड भगवान् शिवको प्रतीक मानी पूजा गर्ने गरेको स्कन्द पुरणमा नै उल्लेख छ । यतिमात्र नभएर शिवको आँसु रुद्राक्षको वनको रूपमा पनि पिण्डेश्वर परिसरमा रहेको धर्मशास्त्रहरूमा उल्लेख छ । रुद्राक्षको फल प्राप्ति गर्ने उद्देश्यले संसारभरि जहाँ लगाए पनि त्यो रुद्राक्ष पिण्ेश्वरमा ल्याएर मन्त्र उच्चारण गरेकै हुनुपर्ने जनविश्वास छ । स्वच्छ मनले मनोकामना गरे, इच्छाएको पूरा हुने कुरा यहाँ आउने भक्तजनहरू आफैंले बताउँदै आइरहेका छन् । जसले गर्दा शिवलाई मान्ने भक्तालुहरू यहाँ आए इच्छाएको कुरा पूरा हुन्छ ।

– वराहक्षेत्रको कोकाहाबाट जल ल्याएर चढाउने गरिन्छ, त्यहीँबाट जल चढाउनै पर्ने त्यस्तो केही धार्मिक विश्वास ?
यसको महत्व स्कन्द पुराणमा उल्लेख छ । यहाँ चाहिँ घडा नै घोप्टिएको स्थानका रूपमा सप्तकोशी गङ्गालाई पुज्ने गरिन्छ । त्यसैले अमृत निकाल्दा शेष रहेको छोक्राको पिण्ड पिण्डेश्वर बनेकाले यसलाई कोशी वा कोकाहाको जल नै चढाउनुपर्छ भन्ने मान्यता रहेको छ ।

प्रस्तुतिः डम्बर कार्की

प्रधानमन्त्रीले दिया ...

ब्लाष्टखबर । भारतका प्रधानमन्त्री नरेन्द्र मोदीले आइतबा ...

सम्बन्ध टुट्दा महिला ...

मानिसहरुले समाजमा पुरुषहरुलाइ बहादुर तथा शक्तिशाली मान् ...

चराचुरुङ्गीको आश्चर् ...

चरासम्बन्धी वेभ साइट avibase.jsp का अनुसार स्वोर्ड हमिङ ...

सरकारले एकसाता लकडाउ ...

धरान । सरकारले अझै एक साता लकडाउन बढाउने तयारी थालेको छ ...

हाम्रो बारेमा

यो वेवसाइट ब्लाष्ट राष्ट्रिय दैनिकको आधिकारिक न्यूज पोर्टल हो । नेपाली भाषाको यो पोर्टलले समाचार, विचार, मनोरञ्जन, खेल, विश्व, सूचना प्रविधि, भिडियो तथा जीवनका विभिन्न आरोह अवरोहका समाचार र विश्लेषणलाई समेटिएको छ । तपाईको सूचनाको भोक मेट्न हामी निरन्तर सूचना प्रवाहमा जागा रहने छौ । राष्ट्रियता, लोकतन्त्र, नागरिक अधिकार, सुशासन र प्रेस स्वतन्त्रताका सवालमा राष्ट्रको पहरेदार भएर हामी लडिरहने छौ ।

सम्पर्क

  • धरान उपमहानगरपालिका-१५ पुष्पलाल मार्ग
  • फोन नं.: ०२५–५२५४५८
  • समाचार शाखाः ०२५–५३३४३५
  • बिज्ञापन शाखाः ०२५–०२५–५३३४१४
  • वेबसाइट: Blastkhabar.com
  • [email protected]

Copyright © 2016 / 2020 - Blastkhabar.com All rights reserved