धरान/सर्वाधिक राषीको प्रथम निसान कस्मेटिक नकआउट फुटसल प्रतियोगिताको उपाधि फुटसल फाइभले उचालेको छ । बुढासुब्बा फुटसल मैदानमा बिहीबार सम्पन्न प्रतियोगितामा फुटसल फाइभले सफायर एलाई ८–३ गोल अन्तरले पराजित गर्दै उपाधि हत्याएको हो । उपाधिसँगै फुटसल फाइभले नगद १ लाख १ हजार रुपैया ट्रफी, मेडल र प्रमाण पत्र प्राप्त गरेको छ । उपविजेतामा चित्त बुझाएको सफायरले ५१ हजार मेडल, ट्रफी र प्रमाण पत्र प्राप्त गरेको छ । त्यस्तै बेष्ट प्लेयर, म्यान अफ दि म्याच र बेष्ट गोलरक्षकलाई ब्याग, ट्रफी प्रदान गरिएको छ । कस्मेटिकका प्रबन्धक चोलेन्द्र श्रेष्ठ, झरना बचत तथा ऋण सहकारी संस्थाका मानबहादुर मगर र पूर्व क्याप्टेन पूर्ण सुब्बाले विजेताहरुलाई नगद तथा ट्रफीहरु प्रदान गरेका थिए । यसैबीच पत्रकार र कस्मेटिकका टिमबीचको प्रतियोगितामा पत्रकारको टोलीले जितेको छ । जसमा सुमन श्रेष्ठले एक्लै १२ गोल गरेका थिए । पत्रकारले कस्मेटिकको टिमलाई १८–८ गोल अन्तरले जितेको हो ।