धरान/चौथो युनाइटेड गोर्खा एकेडेमी भलिबल रनिङ कप अन्तर्गत छात्र तर्फको बुधबारको खेलहरुमा लिटल फ्लावर्स, बालविकास, ज्ञानदर्पण, हाम्रो र आयोजक युजिए ए टिम विजयी बनेका छन् ।
एकेडेमीको भलिबल कोर्टमा जारी खेलमा लिटल फ्लावर्सले समिट उच्चमाविको टिमलाई २–१ को सेटमा हराएको छ । पहिलो सेटमा समिटले लिटललाई २६–२४ मा लिड गर्दा दोस्रो सेटमा लिटलले समिटलाई २५–१८ र तेस्रो सेटमा २५–२० ले हराएको हो ।
त्यस्तै दोस्रो खेलमा धरान मोडललाई बालविकासले २५–१९, २५–१३ को सोझो सेटमा हराएको छ । तेस्रो खेलमा डिपो उच्चमाविले ज्ञानदर्पण तरहरालाई वाकओभर दिएको थियो । चौथो खेलमा हाम्रोले तरहरा मोडललाई २५–२२, २५–२१ को सोझो सेटमा हराउन सफल भएको छ । पाँचौ खेलमा युजिए ए ले पकलीलाई २५–१६ र २५–६ को सेटमा हराउन सफल भएको हो ।
त्यस्तै छात्राहरुको खेलमा हाम्रो, युजिए ए, युजिए वि र लिटल फ्लावर्स विजयी बनेका छन् । हाम्रो र समिटबीचको पहिलो खेलमा हाम्रोले २५–१६, २५–५ को सोझो सेटमा समिटलाई हराएको छ । दोस्रो खेलमा बालविकासलाई युजिए ए टिमले २५–१५, २१–२५ र २५–१९ गरी २–१ को सेटमा हराएको छ ।
तेस्रो खेलमा युजिए विले डिपोलाई २५–१४, २५–८ को सोझो सेटमा हराएको छ । अन्तिम खेलमा लिटल फ्लावर्सले सेक्रेट हार्टलाई २५–२१, २५–२३ को सोझो सेटमा हराएको हो । आज –बिहीबार) छात्रा तर्फ तीन खेल हुने छन् भने छात्र तर्फ ६ वटा खेल हुने प्रिन्सिपल पेम्बा शेर्पाले बताए ।
