नायक निखिल उप्रेतीका चलचित्रहरु दर्शकहरुका लागि सधै प्रतिक्षित बनिरहेको हुन्छ । एक्शन नायकको छवि बनाएका निखिलको पुष २९ गते यस बर्षका लागि पहिलो चलचित्र किंग प्रदर्शनमा आएको थियो । अब अर्को बर्षको सुरुवात अर्थात २०७४ सालको नयाँ बर्षको दिन उनी अभिनित अर्को चलचित्र राधे प्रदर्शनमा आउँदैछ । केही दिन अगाडी मात्र निर्माणपक्षले चलचित्र राधेमा समाबेश ‘मलाई माफ गर प्रिया’ बोल गीत कालिञ्चोकको हिउँमा खिचेको थियो । निखिल उप्रेती र प्रियंका कार्की फिचरिङ गीतलाई खिच्न मात्र ४ दिन लागेको चलचित्रका निर्माता शुशिल पोख्रेलले जानकारी दिए ।
कोरियोग्राफर रामजी लामिछानेका अनुसार, हिउँमा नै सेट लगाएर गीतको भिडियो खिचिएको थियो । गीत खिच्ने क्रममा अत्याधिक चिसोका कारण नायिका प्रियंका कार्की बेहोस समेत भएकी थिइन । गीत खिचेर काठमाडौं फर्किए लगत्तै निर्माणपक्षले चलचित्रको क्यारेक्टर पोस्टर रिलिज गरेको छ । सार्वजनिक एक क्यारेक्टर पोस्टरमा नायिका प्रियंका कार्की फिचरिङ छिन्, जहाँ रातो कर्लरको गाउनमा प्रियंकाले छाता उढेकी छिन् ।
पोष्टरबाट यो स्पष्ट हुन्छ कि चलचित्रमा नायिका प्रियंका कार्की प्रिया नामकी यूवतीको भूमिकामा छिन् । चलचित्र राधेमा नायक निखिल उप्रेती र नायिका प्रियंका कार्कीसँग अर्की नायिका अशिष्मा नकर्मी पनि मुख्य भूमिका छिन् । चलचित्रमा हिमाल केसीको एक्सन, रामजी लामिछानेको नृत्य, कृष्ण श्रेष्ठको छायांकन, अर्जुन पोखरेलको संगीत, गौतमराज खड्काको सम्पादन रहेको छ । हरि ओम् सिने मेकर्सको ब्यानरमा तयार भएको यो चलचित्रलाई सुशिल पोख्रेलले निर्माण गरेका हुन् । चलचित्रका निर्माता सुशिल पोख्रेलले पहिलो पटक फरक कथावस्तुमा चलचित्र राधे निर्माण गरेको जानकारी दिए ।
