काठमाडौं/ एसएलसी परीक्षामा कम्तीमा ‘सी’ ग्रेड ल्याउने परीक्षार्थी मात्रै लोकसेवा आयोगको परीक्षामा सहभागी हुन पाउने भएका छन् ।
एसएलसी उत्तीर्ण शैक्षिक योग्यता भएका परीक्षार्थीहरु खरिदार वा सो सरहको परीक्षाका लागि सामान्यतः योग्य ठहरिन्छन् । लोकसेवा आयोगले हालै शिक्षा मन्त्रालयसँग समन्वय गरेर खरिदार परीक्षाका लागि शैक्षिक योग्यता निर्धारण गरेको हो ।
लोकसेवा आयोगका सहसचिव एवम् प्रवक्ता लक्ष्मीविलास कोइरालाले अनलाइनखबरसँग भने, ‘अब खरिदारको परीक्षा दिनका लागि ग्रेड प्वाइन्ट एभरेज ९जीपीए० कम्तीमा २ वा २ भन्दा माथि हुनुपर्छ । यो भनेको ‘सी’ वा ‘सी’ भन्दा माथिको ग्रेड हो ।’
राष्ट्रिय परीक्षा बोर्डले गत वर्षदेखि नौ वटा ग्रेडमा एसएलसी परीक्षाको नतिजा सार्वजनिक गर्दै आएको छ । एसएलसी परीक्षाको प्राप्ताङ्कका आधारमा विद्यार्थीहरुले ‘ए प्लस’, ‘ए’, ‘बी प्लस’, ‘बी’, ‘सी प्लस’, ‘सी’, ‘डी प्लस’, ‘डी’ र ‘ई’ ग्रेड पाउँछन् । तर, खरिदार पदका लागि शैक्षिक योग्यता के हो भन्ने अन्योल थियो ।
अब भने त्यो अन्योल अन्त्य भएकोले खरिदार पदको विज्ञापन खुलाउने तयारी गरेको लोकसेवा आयोगले जनाएको छ ।
आयोगका प्रवक्ता कोइरालाले भने, ‘आगामी बुधबार खरिदार पदको विज्ञापन खोल्छौं । यो ग्रेड सिस्टमको पहिलो परीक्षा हुनेछ, जसमा सहभागी हुन एसएलसीमा कम्तीमा सी ग्रेड ल्याएको हुनुपर्छ ।’
