अर्को बर्षको भदौ १६ गतेलाई रिलिज डेट लक गर्दै सुहाना इन्टरटेन्मेन्ट र एस.के. थापा प्रोडक्शनले ‘ए मेरो हजुर २’ को र्शिष गीत रिलिज गरेको छ । आइतबार राजधानीमा एक कार्यक्रमका बीच नायिका झरना थापाले निर्देशनमा डेब्यू गरेको चलचित्र ‘ए मेरो हजुर २’ को ‘कसम हो’ बोलको गीत सार्वजनिक गरिएको छ । मुस्ताङको तिलिचो तालमा खिचिएको गीतमा नायिका साम्राज्ञीराज्य लक्ष्मी शाह र नव-नायक सलिनमान बाँनिया फिचरिङ छन् । यो गीत माइनस १० डिग्री सेल्सियसमा खिचिएको हो । साम्राज्ञीको बोल्ड लुक्स र नव-नायक सलिनमानको क्यूट फेसले गीतमा थप सुन्दरता थपेको छ ।
कल्याण सिंहको संगीत, कृष्णहरी बरालको शब्द रहेको गीतमा सुगम पोखरेलको स्वर छ । भिडियोको कोरियोग्राफी रेनशा वान्तवा राईले गरेकी हुन् भने सिनेम्याटोग्राफी सञ्जय लामाको छ ।
गीत समिक्षा गीतबाट चलचित्रको मेकिङ स्पष्ट झल्किन्छ । साम्राज्ञी र सलिनमानमाथी फिल्मांकन गरिएको गीतमा लोभलाग्दा लोकशनले सबैलाई मोहित बनाउँछ । गीतमा कोरियोग्राफर रेनशाको कोरियोग्राफी र सञ्जय लामाको सिनेम्याटोग्राफी सबैभन्दा उत्कृष्ट छ । सञ्जय लामाले ‘कसम हो’ गीतको भिडियोमा मुस्ताङको तिलिचो ताल र त्यस आसपासका मनमोहक दृश्य र साम्राज्ञी र सलिनमानको जोडीलाई उत्कृष्ट तवरले देखाउन कुनै कसर बाँकी राखेका छैनन् । त्यस्तै, साम्राज्ञी र सलिानमानको जोडीलाई निकै सुन्दर तरिकाले पस्कन निर्देशक झरना थापा सफल देखिएकी छिन् । माइनस १० डिग्री सेल्सियसमा खिचिएको यो गीतमा साम्राज्ञीको हट पहिरनले सबैलाई मात खुवाउँछ । केही दिन अगाडी सार्वजनिक टीजर र हाल सार्वजनिक गीतले नै चलचित्र ‘ए मेरो हजुर २’ प्रतिक्षित बनिसकेको छ ।
