शनिश्चरे, मोरङ/झापाको दमकमा दमक रनले शनिबार आयोजना गरेको मिडियाकप ५ किलोमिटर पुरुष दौड प्रतियोगिताको उपाधि यस वर्ष पनि पत्रकार चिरञ्जीवी घिमिरेले हात पारेका छन् ।
दोस्रो मिडिाया कप अन्तर्गतको ५ किलोमिटर दौडमा थाहा सञ्चार र पाथीभरा एफएममा आवद्ध घिमिरेले २४ जना पत्रकारलाई पछि पार्दै २२ मिनेट ४६ सेकेन्डमा दूरी पार गरेका छन् । उनले अघिल्लो वर्ष अर्थात ३ किलोमिटर दुरीको पहिलो मिडिया कप दौडको उपाधि जितेका थिए । महिलातर्फको ३ किलोटिर दौड प्रतियोगिताको उपाधि रेडियो झापाकी नविना थापाले हात पारिन् । उनले १६ मिनेट १८ सेकेन्डमा सो दुरी पार गरिन् ।
पुरूष तर्फको दौडमा स्टार एफएमका पदम खड्का दोस्रो, उत्तम रिजाल तेस्रो भएका छन् । तीनैजनाले डिटिएस ब्रान्डको मोबाइल प्राप्त गरेका छन् । महिला तर्फको दौडमा रेडियो झापाकै रञ्जु निरौला दोस्रो, हिमशिखर टेलिभिजनकी गीता ढुङ्गाना तेस्रो बनेकी छन् । प्रतियोगितामा प्रथम, दोस्रो र तेस्रो हुनेले क्रमशः ३ हजार, २ हजार र १ हजार रुपैयाँ प्राप्त गरेका छन् ।
दमक रनले प्रत्येक शनिबार दमकमा दौड प्रतियोगिता गर्दै आएको छ । ७२ औँ हप्ता अन्तर्गत यो दोस्रो मिडिया कप प्रतियोगिता हो ।
