विराटनगर । संकटमोचन प्रिमियर कप नकआउट क्रिकेट प्रतियोगितामा नोचा विजयी भएको छ । मोरङको धनपानथान गाउँपालिका–४ मा मंगलबार भएको खेलमा कर्सिया क्रिकेट क्बललाई पराजित गरी नोचा विजयी भएको हो । टस जितेर ब्याटीङ्ग गरेको कर्सियाले ८ विकेटको क्षतिमा २० ओभर खेल्दै १४१ रनको चुनौती नोचा सामु खडा गरेको थियो । कर्सियाका मो.साजिदले ३० बलमा सबैभन्दा बढी ३६ रनको स्कोर खडा गरेका थिए । खेलमा कर्सियाका देवले १२ बलमा २३ रन जोड्दै बाहिरिनु परेको थियो भने अर्का ब्याट्समेन जितेन्द्रले १२ बलमा २२ रन जोडेका थिए । यसैगरी खेलमा साजनले १४ बल खेल्दै १२ रन जोडेबाहेक अन्य कुनैपनि खेलाडीले दोहोरो रनको स्कोर खडा गरेनन् । नोचका बलर प्रकाशले ४ ओभरमा कर्सियाका ३ विवेक लिएका थिए भने कुश र नन्दनले ४÷४ ओभरमा समान २÷२ विकेट लिन सफल भएका थिए । नोचाका मो. अफसरले १ विकेट लिन सफल भएका थिए । जवाफमा नोचाका कुशले ३३ बलमा ५८ रनको स्कोर खडा गर्दै टिमलाई विजयी उन्मुख बनाएका थिए । यसैगरी टिमका लागि राजीवले २२ बल खेल्दै २८, नन्दनले १२ बल खेल्दै १६ रन जोडेका थिए । अन्य खेलाडीले दोहोरो अंक जोड्न नसकेपछि नोचाका जीवनले अन्तिम ओभरको अन्तिम बललाई सदुपयोग गर्दै टिमलाई विजयी बनाउन सफल भएका थिए । कर्सियाका जीतेन्द्रले ३, साजनले २ र बबिले १ विकेट लिइएका थिए । खेलमा सर्वाधिक ५८ रनको योगफल जोडी २ विकेट लिइएका कुश म्यान अफ द म्याच भएको आयोजक समितिका सदस्य शम्भु रौनियारले जानकारी दिए ।
