इनरुवा । यस पटकको दशैंमा इनरुवाबासीका लागि मङ्गोलियन हार्टले सांस्कृतिक माहोल तताउने भएको छ । इनरुवा इभेन्ट म्यानेजमेन्टले आयोजना गर्न लागेको सांस्कृतिक कार्यक्रममा मङ्गोलियन हार्टको प्रस्तुति रहनेछ । इनरुवामा आयोजित पत्रकार सम्मेलनमा म्यानेजमेन्टका संयोजक राकेश निरौलाले असोज ३० गते सप्तमीका दिन आयोजना हुने मेघा रिदम इभ कन्सर्टमा मङ्गोलियन हार्टसहित स्थानीय कलाकारको प्रस्तुति रहने बताएका हुन् । सातौं कन्सर्ट आयोजना गर्न लागेको इनरुवा इभेन्ट म्यानेजमेन्टले आर्थिक कठिनाइका बावजुद पनि नगरको पहिचानसहित नगरवासीका लागि साङ्गीतिक माहौल सिर्जना गर्नलागेको जनाएको छ । इनरुवा इभेन्ट म्यानेजमेन्टले यसअघिका वर्षहरूमा समेत राष्ट्रियस्तरका ब्याण्ड र कलाकारलाई बोलाएर साङ्गीतिक कार्यक्रम आयोजना गरिसकेको छ । इनरुवा–३ महेन्द्रचौकमा आयोजना गर्न लागिएको कन्सर्टमा यसपटक भने दर्शकका लागि टिकटको व्यवस्था गरिएको संयोजक निरौलाले बताए ।
