इटहरी /दिनदिनै स्वास्थ्य सेवा महङ्घो वन्दै गइरहेको वेला इटहरी उपमहानगरले निशुल्क स्वास्थ्य सेवा दिइरहेको छ । इटहरी ५ मा शहरी स्वास्थ्य प्रवद्र्धन केन्द्र संचालन गरेर निशुल्क स्वास्थ्य सेवा दिएको हो । उपलब्ध औषधीहरुसमेत निशुल्क दिने गरिएको छ । केन्द्रमा एमविविएस डाक्टर,जनस्वास्थ्य अधिकृत, २ जना स्टाफनर्स,एक जना हेल्थ असिस्टेण्ट लगायत ११ जनाले सेवा दिइरहेका छन ।
विशेषगरि शहरी रहनसहन र जीवनशैलीका कारण हुने रोगहरुको निशुल्क उपचारका लागि शहरी स्वास्थ्य प्रवद्र्धन केन्द्र सुरु गरिएको इटहरी उपमहानगरका प्रमुख प्रसाशकीय अधिकृत छवि रिजालले जानकारी दिए । शहरी स्वास्थ्य प्रवद्र्धन केन्द्रमा विशेष गरि प्रेसर सुगर,वाथ,दम,थाइराइड,मोटोपन,मधुमेह,उच्चरक्तचापका विरामी जचाउन आउने गरेको डा गुन्जन त्रितालले वताए ।
यहाँ ७० प्रकारका औषधी निशुल्क दिइने गरेको छ । शहरी जीवनशैलीका कारण हुने रोगहरु हुन नदिन र भइहाले रोकथाम गर्नका लागि स्वास्थ्य सल्लाह,परामर्श दिने गरिएको डा त्रितालले वताए ।
निशुल्क खोप कार्यक्रम र निशुल्क ल्याव सेवा प्रदान गर्नका लागि तयारी भइरहेको इटहरी उपमहानगर स्वास्थ्य शाखाले जनाएको छ । 
