दमक । झापाको दमकमा जिल्लाव्यापी कलेजस्तरीय फुटबल प्रतियोगिता चलिरहेको छ । जिल्लाभरिका ११ वटा कलेजहरूले सहभागिता जनाइरहेका छन् । जसअन्तर्गत सोमबार भएको खेलमा दमकका दुई कलेज बीच भएको खेलमा ग्लोबल एकेडेमी विजयी भएको छ । दमकमै रहेको मोडल कलेजसँग प्रतिस्पर्धा गरेको ग्लोबलले टाइब्रेकरमार्फत विजयी हासिल गरेको हो । पहिलो खेलमा दुवै समूहले एक–एक–गोलको बराबरी खेलेपछि खेललाई टाइब्रेकरमा लगिएको थियो । दुवै समूहका पाँच–पाँच जना खेलाडीले टाइब्रेकरका लागि गोल हानेका थिए । जसमा ग्लोबलले ६ र मोडलले ५ गोल गरेका थिए । स्वतन्त्र विद्यार्थी युनियन दमक क्याम्पसले अशक्त तथा अपाङ्गता भएका विद्यार्थीको अध्यनका लागि सहयोग गर्ने उद्देश्यले आयोजना गरेको प्रतियोगिता आगामी असोज २४ गतेसम्म चल्ने छ । प्रतियोगिताको मङ्गलबारको खेलमा दमकको आस्था कलेज र बिर्तामोडको कन्काइ कलेजबीच प्रतिस्पर्धा हुने खेल संयोजक तथा स्ववियु सचिव रोशन भण्डारीले जानकारी दिए । प्रतियोगितामा विजेता र उपविजेताले क्रमश ५० हजार र २५ हजार नगदसहित ट्रफी प्राप्त गर्नेछन् ।
