पथरीशनिश्चरे । मोरङको पथरी शनिश्चरे २ स्थित देवीगञ्जका छत्रपाल राईको घरमा आइतवार राती भएको आगलागीमा ६ लाख रुपैयाँ बढीको धनमाल जलेर क्षति भएको छ ।
राती १० बजेको समयमा खोले पकाउने ठाउँमा ननिभेको आगो सल्केर घर पूर्ण रुपमा जल्न पुगेको हो । आगलागीबाट टिनको छानो भएको काठको घर, ४० मन धान, ४ मन चामल, ४ मन तोरी सहितका खाद्यान्ह जलेर नष्ट भएको घरधनी छत्रपाल राईले बताए । स्थानीयले लगभग आगो नियन्त्रणमा लिइसकेपछि दमक र इटहरीको दमकल आइपुगेको थियो ।
आगलागीबाट एउटा बाच्छी मरेको तथा एउटा गाई र एउटा खसी घाइते बनेको छ ।
नगर प्रमुख दिलिपकुमार राई, उपप्रमुख यमुना विष्ट वास्तोला, वडाध्यक्ष यामप्रसाद गुरागाईं सहितका जनप्रतिनिधिहरुले सोमवार विहानै आगलागीबाट भएको क्षतिको अवस्था अवलोकन गरेका छन् ।
