विराटनगर । प्रथम कोशी प्रदेश ब्याडमिन्टन प्रतियोगिताको उपाधि झापाका नवीन सिलवालले जितेका छन् ।
विराटनगर ब्याडमिन्टन क्लबको आयोजना तथा प्रदेश खेलकुद विकास बोर्ड कोशी प्रदेशको प्रायोजनमा विराटनगरमा सम्पन्न भएको प्रतियोगितामा नवीनले उदयपुरका विनय चौधरीलाई हराउँदै उपाधि जितेका हुन् । सिलवालले चौधरीलाई २२–२०, २०–२२ र २१–८ ले पराजित गरे ।
प्रतियोगिताअन्तर्गत मेन्स डबल्सतर्फ झापाका प्रकाश राई र नवीन सिलवालको जोडीले उदयपुरका विनय चौधरी र हिमाल श्रेष्ठको जोडीलाई २१–१८, २०–२२ र २१–११ ले पराजित गर्दै उपाधि जितेका छन् ।
त्यस्तै मास्टर डबल्स ४५ वर्षमाथि विराटनगरका जीवन बोगटी र शिखर श्रेष्ठको जोडीले सागर फिड्सका श्याम लामा र राम तामाङको जोडीलाई २१–८, १८–२१ र २१–१८ ले पराजित गर्दै उपाधि जितेका छन् । मास्टर डबल्स ६० वर्षमाथि विराटनगर ब्याडमिन्टन क्लबका किरणसिंह बस्नेत र मनोज लाखेको जोडीले विराटनगरकै केशव कार्की र श्याम लामाको जोडीलाई २१–१३ र २१–५ ले पराजित गर्दै उपाधि जितेका छन् ।
प्रतियोगितामा मेन्स सिङ्गल र मेन्स डबल्सका प्रथमले २५ हजार, द्वितीयले १५ हजार र तृतीयले १० हजार, मास्टर ४५ र ६० वर्षमाथिका प्रथमले १५ हजार, द्वितीयले १० र तृतीयले ६ हजार रुपैयाँका साथै ट्रफी प्राप्त गरेका छन् । विजेता तथा उपविजेता खेलाडीहरूलाई प्रदेश खेलकुद बोर्डका सदस्य–सचिव हंसराज वाग्ले, नेपाल ब्याडमिन्टन सङ्घका केन्द्रीय सदस्य लवभक्त श्रेष्ठ, विराटनगर ब्याडमिन्टन क्लबका अध्यक्ष किरणसिंह बस्नेतलगायतले पुरस्कार वितरण गरे ।
