अतिक्रमित संरचना हटाउन नगरको निर्देशन

वराहक्षेत्र । वराहक्षेत्र नगरपालिका–५ कालाबन्जारको हैटा खोला अतिक्रमण गरी बनाइएका घरटहरालगायतका संरचना हटाउन नगरले ३५ दिने सूचना जारी गरेको छ ।

नगरले खुनटोलदेखि कालाबन्जार चोकसम्मको अतिक्रमित संरचना हटाउन सूचना जारी गरेको हो । खोला अतिक्रमण गरी संरचना बनाउँदा खोलाको बहाव रोकिएको र पानी सडक साथै मानव बस्तीमा प्रवेश गरेकाले हटाउनका लागि उर्दी जारी गरेको हो । खोलाको बहावलाई यथावत् राख्न सम्बन्धित घरधनीहरूलाई उर्दी गरेको छ । नगरले पहिलो चरणअन्तर्गत खोला अतिक्रमण गरी बनाइएका घरटहरा हटाएको नगर प्रमुख रमेश कार्कीले बताए । उनका अनुसार हाल खोलाको नक्साअनुसारको क्षेत्र निर्धारण गरी सूचना जारी गरिएको छ ।

करिब पाँच सय मिटर क्षेत्र ओगटेको खोलाको जग्गा अतिक्रमण गरी तीन तलासम्मको घर निर्माण गरेका छन् । उक्त क्षेत्रमा एक दर्जनभन्दा बढी घर अतिक्रणण गरी निर्माण गरिएका छन् । नगरका अनुसार खोलाको जग्गा १६ देखि ४० फिटसम्म अतिक्रमण गरिएको पाइएको छ । खोलाको वास्तविक नक्सा कायम गर्न सूचना जारी गरिएको प्रमुख कार्कीले बताए । डेढ वर्षअगाडि नगरपालिकाले अतिक्रमण गरी बनाएको पाँच दर्जनभन्दा बढी घरटहरालाई हटाएको थियो भने पक्की घर बनाएको हकमा ६ महिनाभित्रमा खोला क्षेत्रबाट हट्ने सहमति गरिएको उनले जानकारी दिए । तर त्योअनुसार काम नभएपछि पुनः सूचना जारी गरिएको उनले जानकारी दिए ।

खोलामा संरचना बनाएका कारण बर्खाको समयमा पानीको सतह बढेर लाखौँ रुपैयाँ बराबरको सम्पत्ति क्षति हुने गरेको वडा ५ अध्यक्ष रोहित काफ्ले बताउँछन् । तोकिएको समयमा संरचनाहरू हटाउन अटेर गरे स्थानीय सरकार सञ्चालन ऐन–२०७४ र प्रचलित कानून बमोजिम कारबाही गरिने नगरका सूचना अधिकारी गौरी रायले बताए । त्यस क्षेत्रमा करिब ४० वर्षदेखि समस्याको रूपमा रहेको सूचना अधिकारी रायले जानकारी दिए । यस्तै वडा १ को औलिया बाबा मठको प्रवेश द्वारको पश्चिम दिशातर्फ निर्माण गरिएका शौचालय, बाख्राको खोर र सुँगुरको खोरसमेत हटाउनका लागि सूचना जारी गरिएको छ ।