विजयपुर । शिक्षा तथा खेलकुद मन्त्री सस्मित पोखरेलले सबै सरोकारवालाको अपनत्व हुने गरी शिक्षा ऐन चाँडै ल्याउने बताएका छन् ।
शिक्षा तथा खेलकुद मन्त्रालयमा निजी विद्यालय सञ्चालकका विभिन्न छाता संगठनका प्रतिनिधिसँग मंगलबार आयोजित अन्तरक्रियामा मन्त्री पोखरेलले ऐन निर्माणका क्रममा प्राप्त सुझावलाई समेट्दै परिपक्व ढङ्गले ऐनलाई अन्तिम रूप दिइने बताए ।
“शिक्षा ऐन निर्माणका क्रममा जति पनि सरोकारवालासँग छलफल भएको छ, उहाँहरूबाट आएका राय–सुझावलाई समेटेर ऐन चाँडो टुङ्ग्याउनेछौँ,” उनले भने, “कुनै पनि ऐन तथा नीति बनाउँदा सबै स्टेकहोल्डरको अपनत्व हुनुपर्छ। सोही बुझाइका साथ सकेसम्म सबै सरोकारवालासँग छलफल गरेका छौँ।”
मन्त्री पोखरेलले सरकार र निजी क्षेत्रबीचको साझेदारीलाई थप बलियो बनाउँदै गुणस्तरीय तथा व्यावहारिक शिक्षा सुनिश्चित गर्नुपर्नेमा जोड दिए । सरकारले शिक्षा क्षेत्रका सबै सरोकारवालालाई साझेदारका रूपमा लिएको उनको भनाइ थियो ।
शिक्षामन्त्रीका सल्लाहकार शैलेन्द्र झाले शिक्षा ऐन तथा राष्ट्रिय पाठ्यक्रम प्रारूप निर्माण गर्दा सरोकारवालाका सुझाव समेटेर ऐनलाई थप समृद्ध बनाइने बताए । उनले राष्ट्रिय पाठ्यक्रमलाई समयसापेक्ष र व्यावहारिक बनाउने तर्फ पनि ध्यान दिइने उल्लेख गरे । मन्त्रालयका सहसचिव शिवकुमार सापकोटाले सरोकारवालासँगको छलफल र समन्वयबाट विद्यालय शिक्षामा नीतिगत सुधार गरिने बताए ।
हिसानका महासचिव रामहरि शिलवालले नयाँ शिक्षा ऐनले शिक्षाको राष्ट्रिय उद्देश्य पूरा गर्ने गरी गुणस्तरीय र दक्ष जनशक्ति उत्पादनमा जोड दिनुपर्ने बताए । उनले पाठ्यक्रम समयसापेक्ष, वैज्ञानिक र व्यावहारिक हुनुपर्ने धारणा राखे ।
काठमाडौँ वर्ल्ड स्कुलका व्यवस्थापन समिति अध्यक्ष इन्जिनियर डा. मिथिलेशकुमार झाले राष्ट्रिय पाठ्यक्रम प्रारूपलाई वर्तमान आवश्यकतामा आधारित बनाउँदै शिक्षालाई सीपसँग जोड्नुपर्ने बताए । एपिनका उपाध्यक्ष शारदा पाण्डेले प्रारम्भिक बाल विकास (ईसीडी) शिक्षालाई सरकारले विशेष प्राथमिकता दिनुपर्नेमा जोड दिए । केएमसी कलेजका अध्यक्ष रामेश्वर अर्याल र ग्लोबल कलेजका निर्देशक राजेन्द्रप्रसाद त्रिपाठीले निजी क्षेत्रका समस्या तथा सरोकारका विषयमा मन्त्रालयले निरन्तर छलफल गरिरहेको भन्दै शिक्षा क्षेत्र सुधारका लागि सहकार्य जारी राख्ने प्रतिबद्धता जनाए । मन्त्रालयले शिक्षा ऐन, राष्ट्रिय पाठ्यक्रम प्रारूप तथा पछिल्लो प्राकृतिक विपत्तिका विषयमा निजी क्षेत्रका विद्यालय सञ्चालकसँग अन्तरक्रिया गरेको हो । कार्यक्रममा प्याब्सन, एनप्याब्सन, हिसान, एपिन लगायत निजी विद्यालयसँग सम्बन्धित विभिन्न संघसंस्थाका पदाधिकारी तथा प्रतिनिधिको सहभागिता थियो । रासस
