बेलबारी/ मोरङको बेलबारीस्थित बेलबारी नगर खेलकुद विकास समिति र नमस्ते लालभित्ती खेलकुद क्लबको आयोजनामा प्रथम बेलबारी नगर अन्तरवडास्तरीय 
फुटवल प्रतियोगिता शनिबार शुरु हुने भएको छ ।
असार १ गतेसम्म हुने प्रतियोगितामा नगरका ११ वडा सहभागी हुनेछन् । राष्ट्रका लागि खेलकुद, स्वास्थ्यका लागि खेलकुद भन्ने नारासहित खेलाडीहरुबीच बलियो सम्बन्ध स्थापना गर्ने, छरिएर रहेका प्रतिभालाई एकीकृत गर्ने र युवालाई कुलतबाट जोगाइ खेलकुदमा लाग्न अभिप्रेरित गर्ने उद्देश्यले प्रतियोगिता आयोजना गरिएको आयोजक क्लबका सचिव तुलसी ढकालले बताए ।
प्रतियोगितामा प्रथम हुनेलाई २५ हजार रुपैयाँ, ट्रफी र खेलकुद सामग्री, दोस्रो हुनेलाई १५ हजार ट्रफी र खेलकुद सामग्री प्रदान गरिने खेलकुद विकास समितिका अध्यक्ष हेमन्त सुवेदीले बताए । खेलका उत्कृष्ट एक खेलाडीलाई ३ हजार रुपैयाँसहित ट्रफी र प्रत्येक खेलका १ खेलाडीलाई म्यान अफ दी म्याच घोषित गरिने भएको छ ।
