महेन्द्रनगर/ प्रकाशपुरको राजाबास युथ क्लबको आयोजना तथा सरस्वती मावि र सुनसरी जिल्ला फूटलबल सङ्घको सहयोगमा आयोजित चौथो राजाबास क्षेत्रीय फूटलबल प्रतियोगिताको फाइनल खेलमा पूर्व क्षेत्रीय प्रहरी तालिम केन्द्र विजयी भएको छ ।फाइनलमा पूर्व क्षेत्रीय प्रहरीले सगरमाथा फूटलबल क्लबलाई २–० गोल अन्तरले पराजित गरेको छ ।
खेलको पहिलो हाफको १८ औं मिनेटमा उज्ज्वल राईले १ गोल र दोस्रो हाफको ३० औं मिनेटमा विशाल खवासले १ गोल गरेका थिए ।विजेता टिमले ४१ हजार रुपैयाँ, ट्रफी र उपविजेता टिमले ३१ हजार र ट्रफी पाएका छन् । यस्तै फाइनलको म्यान अफ दी म्याच भएका सगरमाथाका राजकुमार राईलाई २ हजार र ट्रफी तथा म्यान अफ दी सिरिज पूर्व क्षेत्रीय प्रहरी तालिम केन्द्रका उज्ज्वल राईलाई ५ हजार रुपैयाँ र ट्रफी तथा हाइस्कोलर उज्वल राईलाई ३ हजार रुपैयाँ र ट्रफी प्रदान गरिएको थियो ।राष्ट्रिय खेलकुद परिषदका सदस्य सचिव केशवकुमार विष्टको प्रमुख आतिथ्यमा समापन कार्यक्रम भएको थियो ।
