दर्जनौ म्यूजिक भिडियोमा काम गरिसकेकी नायिका वर्षा सिवाकोटीले ‘नाई नभन्नू ल २’ बाट नेपाली रजतपटमा भित्रिएकी थिइन् । आफ्नो डेब्यू फिल्म हिट भएपछि वर्षाको खुट्टा भुइँमा थिएन ।पहिलो फिल्म नै हिट भएपछि उनलाई आफ्नो फिल्ममा साइन गर्न निर्माताहरुको तछाडमछाड पनि खुबै थियो ।
सायद उनलाई लागेको थियो अब म सुपरस्टार भएँ । तर, ‘नाई नभन्नू ल २’ पछि उनी अभिनित कुनै पनि फिल्मले सफलता पाउन सकेन। यसो भन्दै गर्दा तपाईको मनमा प्रश्न उब्जिन सक्छ । वर्षा अभिनित फिल्म ‘पशुपतिप्रसाद’ हिट भएको थियो त रु हो, उनी अभिनित ‘पशुपतिप्रसाद’ हिट भएको थियो तर वर्षालाई यसले कुनै फरक पारेनन् ।
फिल्मका मुख्य कलाकार खगेन्द्र लामिछानेको अगाडि वर्षा पर्दामा नै हराइन् । यसपछि उनी अभिनित फिल्म रिलिज भयो ‘सुब्बा साब’। यो फिल्म हिट हुन्छ भन्ने त उनलाई नै आश थिएन । त्यसैले त उनी फिल्मको प्रचार प्रसारमा पनि देखिइनन् ।
उनले सोचे जस्तै‘सुब्बा साब’ पनि उठ्न नसक्ने गरि बस्यो । यस्तै, गएको वर्ष उनी अभिनित फिल्म रिलिज भएको थियो ‘लप्पन छप्पन’। फिल्म सफल भएको हल्ला चलेपनि सौगात मल्ल, दयाहाङ राई र अर्पण थापा जस्ता स्टार नायकको चेपुवामा परिन् वर्षा ।
यही असार १६ गते उनी अभिनित अर्को फिल्म ‘कारखाना’ रिलिज भएको थियो । फिल्ममा प्रचारमा पनि उनी खुबै दौडिइन् । फिल्ममा नायक शूशील श्रेष्ठको भन्दा वर्षाको भूमिका विशेष थियो । तर, कारखानालाई पनि दर्शकको खडेरी लाग्यो ।
लगातार फिल्म असफल हुँदा अहिले वर्षालाई एउटा डरले खुबै सताउन थालेको छ, के अब आफू गुमनाम त हुने होइन रु उनी अहिले कुनै पनि फिल्मको काममा व्यस्त छैनन् ।
