रंगेली / खुल्ला सिमानाको फाइदा उठाउदै भन्सार छली सामान ओसार पसर गर्ने क्रम बढेर गएको छ । मोरङ प्रहरीले विहिबार नेपाल भारत सिमा क्षेत्रबाट ढेड लाख भन्दा बढी मुल्यका विभिन्न सामान बरामद गरेको छ । बिराटनगर महानगरपालिका वडा नं. १६ स्थित महेन्द्र चोक तथा हुलास चोकबाट भारतको जोगवनीबाट अबैध रुपमा भन्सार छलि ल्याएको ३४ हजार मुल्य बरावरको किराना सामान प्रहरीले बरामद गरेको छ । त्यस्तै नेपाल बाट भारत लैजादै गरेको २९ हजार मुल्य बरावरको ५ के.जी. मरिच र पंखाको चक ४ सय ४० थान मटेरुवामा प्रहरीले बरामद गरेको छ । साथै बिराटनगर १७ स्थित खोक्साबाट को.५ प ३५५ नं.को मोटरसाईकलमा ल्याउदै गरेको ८० हजार ५ सय मुल्य बरावरको कुर्था सुरुवाल ६५ थान प्रहरीले नियन्त्रणमा लिएको छ । कुर्ता सुरुवाल ल्याउने मोरङ बेलबारी १ का ५८ वर्षीय जोगेन्द्र मण्डललाई पनि प्रहरीले पक्राउ गरेको छ । मानिस, सवारी र सामान भन्सार कार्यालय रानी विराटनगरमा बुझाईएको मोरङ प्रहरीले जनाएको छ । त्यसैगरी मोरङको बेलबारी नगरपालीका ६ र ७ राईझारबाट बिराटनगर तर्फ ल्याउदै गरेको १६० लिटर अबैध घरेलु मदिरा प्रहरीले नियन्त्रणमा लिएको छ । कारवाहीको लागि आन्तरिक राजश्व कार्यालय विराटनगर पठाएको मोरङ प्रहरीले जनाएको छ ।
