पाँचथर । खोलामा माछा मार्ने क्रममा बगेर बेपत्ता भएका एक व्यक्ति तीन दिनमा पनि फेला पर्न सकेका छैनन् । माछा मार्न गएका कुम्मायक गाउँपालिका–४ का देवीप्रसाद लिम्बू बिहीबार बिहान बेपत्ता भएका थिए । उनी फिदिम नगरपालिका र हिलिहाङ गाउँपालिकाको सिमाना हेंवा र फेमे खोलाको दोभानबाट बेपत्ता भएको प्रहरीले जनाएको छ । लिम्बूलाई बिहीबार नै खोलाले बगाए पनि परिवारले शुक्रबार बिहान ११ बजे मात्र खबर गरेकाले खोजी कार्यमा समस्या भएको पाँचथर प्रहरीले जनाएको छ । खबर पाउनासाथ नेपाल प्रहरी र सशस्त्र प्रहरीको टोलीले लिम्बूको खोजी कार्य शुरु गरेको पाँचथर प्रहरी प्रवक्ता अनिलकुमार पौडेलले बताए । खोला धमिलो भएका कारण खोजीकार्य कठिनाइ भएको पौडेलले बताए । उनले भने, ‘लिम्बूको शव तमोर नदी हुँदै बगेको हुन सक्ने भएकाले प्रदेश प्रहरीलाई पत्राचार गरी तेह्रथुम, धनकुटालगायतका तमोर नदी किनारामा पनि खोजी गर्न आग्रह गरेका छौँ ।’