ताप्लेजुङ /तीन विभागीय र गण्डकी प्रदेश टिम तेस्रो पाथीभरा राष्ट्रिय भलिबल प्रतियोगिताको सेमिफाइनल प्रवेश गरेका छन् ।
मंगलबार सम्पन्न खेलमा नेपाल पुलिसले प्रदेश ३ लाई २५–११,२४–२६,२५–१५,२५–१४ तथा गण्डकी प्रदेशले विश्वविद्यालयलाई २५–१६,२५–११,२५–१७ को सेटमा पराजित गरे । त्यस्तै एपिएफसँग प्रदेश १ टिम २५–१५,२५–१४,२५–२० र नेपाल आर्मीसँग प्रदेश २ २५–१४,२५–१५ तथा २५–८ को सोझो सेटमा पराजय ब्यहोर्न बाध्य भयो ।
पुलिसमा ५ र आर्मीमा ७ जना राष्ट्रिय टिममा खेलाडी थिए । ताप्लेजुङको मैवाखोला गाउँपालिकास्थित नारायणी माविको मैदानमा जारी प्रतियोगितामा गण्डकी प्रदेश बाहेक कुनै क्षेत्रीय टिमले सेमीफाइनल यात्रा तय गर्न सकेनन् । फाइनल प्रवेशका लागि बुधबार हुने खेलमा पुलिस र गण्डकी प्रदेश तथा एपिएफ र आर्मी भिड्दैछन् । जलजले क्लब साँघुकाे आयोजनामा जारी खेलकाे फाइनल वैशाख २६ गते हुनेछ ।
