वराहक्षेत्र । हाटखोला फुटवल क्लवको आयोजनामा वराहक्षेत्र नगरपालिकाको वार्ड नं २ मा ‘प्रथम क्लव स्तरीय फुटवल प्रतियोगिता’ हुने भएको छ ।
आइतबार चतरामा पत्रकार सम्मेलन गर्दै आयोजकले मंसिर २३ गतेबाट फुटबल सुुरु हुने बताएको छ । प्रतियोगितामा नगरको ९ धरानको १ गरी १० टिम सहभागी छन् ।
खेल्ने टिमहरुमा चतरा फुटबल क्लब, पाञ्चायन फुटबल क्लब, राजावास युवा क्लब, वराहयुथ क्लब तित्रीगाछी, ग्रिनकल्चर फुटबल क्लब चक्रघट्टी, आयोजक हाटखोला फुटबल क्लब रातो र निलो यसैगरी सप्तकोशी फुटबल क्लब देवीघाट, एभरेष्ट फुटबल क्लव नडाहा र पटनाली फुटबल क्लव धरान भएको, आयोजक हाटखोला फुटबल क्लवका अध्यक्ष विकास सुनुवारले बताए ।
प्रतियोगितामा प्रथम र दोश्रो पुरस्कार नगद ५१ हजार र ३१ हजार रुपैंया, प्रमाण पत्र, मेडल र ट्रफी रहेको छ । विद्यागत पुरस्कार तर्फ उत्कृष्ट खेलाडीलाई ५ हजार र सर्वाधिक गोलकर्ता, उत्कृष्ट कोच, गोल कीपर, मिड फिल्डर, रक्षा पंक्ति खेलाडी र राइजिङ्गप्लेयरलाई जनही ३ हजार दिइनेछ भने प्रत्येक दिनको खेलको म्यानअफ द म्याच खेलाडीलाई २ हजार रुपैंया प्रदान गरिने अध्यक्ष राईले बताए ।
८ लाख रुपैंया बजेट रहेको फुटबल खेल, २ नं वडास्थित वाह्विघे खेल मैदान दिउँसो १ बजेबाट हुने प्रतियोगिताको उद्घाटन खेल चतरा फुटबल क्लव र सप्तकोशी फुटबल क्लबका बिच हुनेछ । खेलको समापन पुष ३ गते हुने प्रतियोगिताको संयोजक रोशन श्रेष्ठले बताए ।
