देउराली । धरान उपमहानगरपालिकाको ५ नम्बर वडा स्थित तल्लो देउरालीमा आगलागी हुँदा एक घर जलेर पूर्ण रूपमा नष्ट भएको छ ।
आज बिहान १० बजे स्थानीय कुमार माझीको घरमा आगलागी भएको हो । घरमा कोही नभको बेला आगलागी हुँदा घर पूर्ण रूपमा जलेर नष्ट भएको अस्थायी प्रहरी चौकी देउरालीले जनाएको छ ।
टिनको बेरा तथा छानो भएको उक्त घरमा स्थानीले आगलागी भएको देखेपछि धरान उपमहानगरपालिकाको वारुण तथा अस्थायी प्रहरी चौकी देउरालीलाई खबर गरेका थिए । खबर पाउनसाथ आगालागि भएको स्थानमा आइपुगेको वारुण यन्त्र र स्थानीयले आगो नियन्त्रणमा लिए पनि घरभित्र रहेका खाद्यान्न लत्ताकपडा, फर्निचर लगायतका कुनै पनि सामानहरू जोगाउन नसकिएको प्रहरी चौकी देउरालीमा कार्यरत प्रहरीले बताएका छन् ।
आगलागीको सम्पूर्ण क्षतिको यकिन नभए पनि ५ लाख भन्दा बढीको क्षति भएको हुनसक्ने प्रहरीको अनुमान छ ।
आगलागीको कारण भने खुलिसकेको छैन । खाना पकाउने ग्यास लिक भएर आगलागी भएको हुनसक्ने अनुमान गरिएको छ भने घरभित्र रहेको ग्यासको सिलिन्डर पड्किएको अवस्थामा रहेको छ । माझी र उनकी श्रीमती निर्माण मजदुर हुन् ।
