धरान । क्षेत्रीय सम्मेलन प्रचारात्मक अभियानअन्तर्गत नेपाली काङ्ग्रेस क्षेत्रीय समितिको आयोजनामा सम्पन्न रस्सीतान प्रतियोगितामा वराहक्षेत्र ३ र रामधुनी ६ विजयी भएका छन् ।
रस्सीतान प्रतियोगितामा पुरुषतर्फ वराहक्षेत्र ३ र महिलातर्फ रामधुनी ६ विजयी भएको हो । नेपाली कांग्रेसको क्षेत्र नं. १ सुनसरी तथा प्रदेशसभा १(१) र १(२) को संयुक्त सम्मेलनको अवसरमा आयोजित कार्यक्रममा वराहक्षेत्र–५ वडा र रामधुनी नगरपालिकाको २ वडा गरी ७ वटा वडाका पुरुष र महिला टीमबीच प्रतिस्पर्धा भएको थियो । पुरुषतर्फ फाइनल खेलमा वराहक्षेत्र ३ ले बराहक्षेत्र ५ लाई हराएका थिए भने महिलातर्फको फाइनल खेलमा रामधुनी ६ ले वराहक्षेत्र ५ लाई हराएका थिए ।
प्रतियोगितामा प्रथम र द्वितीय हुने खेलाडीहरूलाई असार २९ र ३० गते हुने सम्मेलनमा पार्टीका महामन्त्री गगनकुमार थापाबाट प्रमाण–पत्र, मेडल र नगर पुरस्कार प्रदान गरिने क्षेत्रीय सचिव एवम् प्रवक्ता केशव पुरीले बताए । कार्यक्रममा प्रमुख अतिथि एवम् प्रदेश सांसद ममता तामाङ, क्षेत्रीय सभापति सुजेन्द्र तामाङ, पूर्व जिल्ला सचिव एवम् क्षेत्रीय सल्लाहकार बुद्धि कटवाललगायत सहभागी रहेका थिए ।
त्यस्तै दौड प्रतियोगितामा नवीन तामाङ र छेन्वीमाया राई प्रथम भएका छन् । पाँच किलोमिटर दौड प्रतियोगितामा धरान–१५ निवासी तामाङले १५ दशमलव १ मिनेटमा निर्धारित दूरी पूरा गरेका थिए । त्यस्तै महिलातर्फ धरान–१९ की राईले निर्धारित दूरी १९ दशमलव ४६ मिनेटमा पूरा गरेकी थिइन् ।
पुरुषतर्फ धरान ५ का प्रशान्त तामाङ दोस्रो हुँदा भारतीय सेनामा समेत रहेका भोजपुर तिवारीभञ्ज्याङका पवन राई तेस्रो भए । महिलातर्फ धरान–१९ की निक्की नेम्वाङ र धरान–५ की नानी तामाङ क्रमशः दोस्रो र तेस्रो भएका छन् । सहभागीलाई सहभागीको प्रमाण–पत्र क्षेत्रीय सभापति सुजेन्द्र तामाङले प्रदान गरेका थिए । धरान रनको संयोजकत्वमा कार्यक्रम सम्पन्न भएको हो ।
