धरान । सुनसरीको दक्षिणवर्ती गाउँपालिका बर्जु गाउँपालिका ४ बाट २९७ केजी गाँजासहित एकजनालाई सुनसरी प्रहरीले कात्तिक ११ गते पक्राउ गरेको छ ।
जिल्ला प्रहरी कार्यालय सुनसरीका अनुसार बर्जु गाउँपालिका ४ बाट चार बोरा गाँजासहित सोही ठाउँकै शङ्कर मण्डललाई पक्राउ गरेको छ । शंकास्पद अवस्थामा बोराहरु अनलोड भइरहेको सूचनाका अनुसार इलाका प्रहरी कार्यालय दुहवी र प्रहरी चौकी अमडुवाबाट खटिएको प्रहरी टोलीले चार बोरा गाँजा र मण्डललाई पक्राउ गरेको हो ।
प्रहरीलाई देख्नेबित्तिकै मण्डल भागेका थिए । भाग्दै गरेको अवस्थामा नियन्त्रणमा लिइएको थियो । पछि जाँच गर्दा उखुबारीमा थप पाँच बोरा फेला पारिएको थियो । इलाका प्रहरी कार्यालय साहेबगञ्ज र सशस्त्र प्रहरी बिओपी हरवनीवको टोलीले थप पाँच बोरा गाँजा बरामद गर्न सफल भएको हो । नियन्त्रणमा लिइएको ९ बोरा गाँजा कुल २९७ केजी रहेको सुनसरी प्रहरीले जनाएको छ । आरोपितलाई इलाका प्रहरी कार्यालय दुहवीमा राखी थप अनुसन्धान भइरहेको प्रहरीले जनाएको छ ।
