युक्रेन। रूसी पक्षले बिहीबार गरेको मिसाइल तथा ड्रोन आक्रमणका कारण किएभमा कम्तिमा आठ जनाको मृत्यु हुनुका साथै दर्जनौं घाइते भएको युक्रनी राष्ट्रपति भोलोदिमिर जेलेन्स्कीले बताएका छन्। उनका अनुसार मस्कोले “ठूलो आक्रमण“ को तयारी गरिरहेको चेतावनी दिएपछि यो आक्रमण भएको थियो।
युक्रेनको वायुसेनाले ब्यालेस्टिक मिसाइलहरू राजधानीतर्फ गइरहेको चेतावनी दिएपछि तथा जेलेन्स्कीले डब्लिनको भ्रमण छोटो पारेर फर्किएपछि उक्त आक्रमण भएको जनाइएको छ।
मध्य र पूर्वी किएभमा एक दर्जनभन्दा बढी विस्फोटहरू भएपछि बासिन्दाहरू–केही बच्चाहरू र घरपालुवा जनावरहरूसँग–मेट्रो स्टेशनहरूमा आश्रय लिन हतार–हतार दौडिरहेको एएफपीले जनाएको छ।
आक्रमणले आठ जनाको ज्यान लिएको पुष्टि गर्दै कम्तिमा २५ जना घाइते भएको सैन्य प्रशासनका प्रमुख तिमुर टाकाचेन्कोले बताउनुभएको छ। उनका अनुसार नागरिक तथा आवासीय क्षेत्रहरू लक्षित गरी आक्रमण गरिएको छ।
क्षेत्रीय गभर्नर माइकोला कलास्निकका अनुसार आक्रमणमा किएभ क्षेत्रका पाँच जिल्लाहरू प्रभावित भएका छन्।
“रातको समयमा, स्ट्राइक ड्रोन, ब्यालेस्टिक मिसाइल र क्रुज मिसाइलहरू प्रयोग गरेर किएभ क्षेत्रमा ठूलो आक्रमण गरिएको छ,” कलास्निकले टेलिग्राम मार्फत बताएका छन्।
आपतकालीन कर्मचारीहरूले बुचा जिल्लाको गोदाम र एउटा घरमा आगो निभाउँदै गरेको उल्लेख गर्दै आक्रमणले यस क्षेत्रका घर, तथा छात्रावास र सवारी साधनहरू क्षतिग्रस्त भएको उनले बताएको छ।
मध्य किएभमा हवाई–आक्रमण चेतावनीको क्रममा भएको विस्फोटपछि आकाशमा धुवाँ तथा आगोको मुस्लोसहितको बादल देखिएको जनाइएको छ।
आक्रमणको लगभग ५० मिनेट पछि प्रारम्भिक प्रभाव स्थल नजिकै भएको दोस्रो विस्फोटले वायु मण्डलमा विषाक्त धुवाँ पठाएको थियो।
युक्रेनी आपतकालीन सेवाहरूले सार्वजनिक गरेका तस्बिरहरूले आवासीय ब्लकमा व्यापक क्षति देखाएका छन्।
रुसले ठुलो आक्रमण गर्न लागेको गुप्तचर रिपोर्टका कारण उनी डब्लिनको भ्रमणबाट घर फर्किरहेको जेलेन्स्कीले बताएका छन्।
उनले पत्रकार सम्मेलनमा जनतालाई सावधान रहन आग्रह गर्दै आफ्ना बच्चाहरू तथा परिवारलाई सुरक्षित राख्न आश्रयहरू प्रयोग गर्न र आक्रमणको चेतावनीहरूमा ध्यान दिन आह्वान गरेका छन्।
उनले रूसी राष्ट्रपति भ्लादिमिर पुटिनले केही समयदेखि युक्रेन विरुद्धको ठुलो आक्रमणको तयारी गरिरहेको “खुलासा गरेका छन्।
यसैगरी युक्रेनले पनि पछिल्लो समयमा रूसी ऊर्जा पूर्वाधार र सैन्य लक्ष्यहरूलाई लक्षित गर्दै लामो दूरीको ड्रोन आक्रमणहरू पनि बढाएको जनाइएको छ।
रूसी अधिकारीहरूले सीमावर्ती क्षेत्रहरूमा बारम्बार आक्रमण गरेको रिपोर्ट गरेका छन् भने मस्कोले युक्रेनबाट आएका सयौं ड्रोनहरू आफ्नो हवाई सुरक्षाले रोकेको बताएको छ।
द्वन्द्व अन्त्य गर्ने अमेरिकी मध्यस्थता प्रयास अहिलेसम्म असफल भएको जनाइएको छ भने, रूसले युद्ध अन्त्य गर्न पूर्ण रूपमा अस्वीकार गरिरहेको जेलेन्स्कीले बताएका छन्।
यद्यपि सबै सम्भावित आधिकारिक र अनौपचारिक च्यानलहरू मार्फत युद्ध समाप्त गर्न सकिने आशाका साथ युक्रेन बैठक र अर्थपूर्ण वार्ताका लागि तयारी गरिरहेको उनले बताएको छ। रासस
