विराटनगर/ नर्वाचनमा प्राप्त मत परिणामको विश्लेषण गर्दै बाम गठबन्धनले प्राप्त गरेको उपलब्धी रक्षाका लागि मोरङका बामगठबन्धका बुद्धिजिवीहरुले पार्टी एकता गर्न दबाब दिएका छन् ।
विरानटगरमा प्रेस चौतारी र प्रेस सेन्टर मोरङले ‘ताजा जनादेश र कम्युनिष्ट एकता’ विषयमा शनिबार गरेको कार्यक्रममा बोल्दै एमाले तथा माओवादी निकटका बाम बुद्धिजीवि तथा पार्टी नेताहरुले पार्टी एकताको पक्षमा दबाब सिर्जना आवश्यक रहेको बताएका हुन् ।
निर्वाचन अघि जनतासँग गरेको प्रतिवद्धता अनुरुप दुई पार्टीबीचको एकतालाई निष्कर्षमा पुर्याउँदै अन्य कम्युनिष्ट पार्टीहरुलाई मिलाएर एउटै कम्युनिष्ट पार्टी निर्माण गर्न उनीहरुले जोड दिए ।
कार्यक्रममा कार्यपत्र प्रस्तुत गर्दै अधिवक्त चुँडामणी आचार्यले निर्वाचनमा प्राप्त मत परिणामको विश्लेषण गर्दै बाम गठबन्धनले प्राप्त गरेको उपलब्धी रक्षाका लागि एकतामा जोड दिए । गठबन्धन नभएको अवस्थामा अहिले पनि बामपन्थीहरुको हातमा सत्ता आउने अवस्था नरहेको यथार्थ चित्रण गर्दै अबको राजनीतिलाई फोहोरी खेल नभएर सम्भावनाको खेलमा परिणत गर्नुपर्ने बताए । उनले सैद्धान्तीक, वैचारिक र सांगठनीक संरचना मिलाएर पार्टीलाई एक बताउनु पर्नेमा जोड दिए ।
नेकपा एमाले मोरङका अध्यक्ष विनोद ढकालले कम्युनिष्टहरुले आउँदो ५ वर्ष मात्र नभई लामो समय शासन संचालन गर्नका लागि पनि पार्टी एकता गर्ने र देशलाई समुन्नत बनाउने दिशामा लाग्नुपर्ने बताए । उनले सानासाना कुरामा विवाद झिक्ने भन्दा मिल्ने विषय खोजेर अघि बढ्नुपर्नेमा जोड दिए । एकताका लागि प्रधानमन्त्री र अध्यक्ष फरकफरक व्यक्ति बन्ने, एउटै बन्ने, दुवै अध्यक्ष बन्नेलगायतका मोडलमा छलफल जारी रहेको ढकालले जानकारी दिए ।
यस्तै माओवादी केन्द्रका मोरङ संयोजक गोपी आछामिले सुशासन, आर्थिक उन्नती र समाजवादका लागि कम्युनिष्टहरुकाबीचको एकता अपरिहार्य रहेको बताए । यसका लागि अन्य कुराहरु थाँती राखेर पावर शेयरिङका आधारमा एकता प्रक्रिया अगाडि बढाउनु उपर्युक्त हुने बताए ।
बामपन्थी गठबन्धनलाई जनमतसंग्रहबाट एकताको निम्ति जनादेश दिएको बताउँदै माओवादी केन्द्र मोरङका सहसंयोजक गणेश उप्रेती (सुशील)ले समावादको लक्ष्य प्राप्तीका लागि एकता आवश्यक रहकोमा जोड दिए । ‘अस्थीर सरकारमा मन्त्री बन्न लोभ गर्ने दुवै पार्टीभित्रका बिचौलियाहरुले एकताको विरोध गरिरहेका छन्,’ उप्रेतीले भने, ‘पार्टी एकताको विषय अहिल्यै टुंग्याउनु पर्छ भन्ने छैन, तर सरकार दिगो बनाउनु पर्छ ।’
बाम बुद्धिजीवि प्राध्यापक गणेश क्षेत्रीले जडसुत्रवादी सोचबाट माथि उठेर एकता गर्नुपर्नेमा जोड दिए । प्राध्यापक डाक्टर मिनराज ढकालले गठबन्धन असफल भए देश असफल हुने खतरा रहेको दाबी गरे । कार्यक्रममा बुद्धिजीवि तथा प्राध्यापक डाक्टर मेदनीप्रसाद शर्मा, बाम बुद्धिजीवि यज्ञ शर्मा, नारायण निरौला, मुक्ति बराल, हरि बराल, मणी दाहाल, नारायण दाहाल, भवानी भट्टराईलगायतले बोलेका थिए ।
