सुनसरी/ वैदेशिक रोजगार तथा स्वरोजगार बजारलाई दक्ष जनशक्ति दिने उद्देश्यले सुनसरीको इटहरीमा अञ्जली ग्रुपद्वारा प्रर्वद्दित अञ्जली टेक्निकल इष्टिच्यूटको शाखा सञ्चालनमा ल्याइएको छ।
झापाको बिर्तामोडमा मुख्य कार्यालय रहेको इष्टिच्यूटले यसअघि राजधानी काठमाडौँमा शाखा सञ्चालनमा ल्याइसकेको छ।
अञ्जली अस्पताल, पास इन्टरनेसनल प्रालि, अञ्जली ओभरसिज, मेचीकाली टाभल्स एण्ड टुर्स, अञ्जली एड एजेन्सी तथा कञ्चनजंघा होटललगायत सञ्चालन गरेर सयौँलाई रोजगारी दिँदै आएको अञ्जली ग्रुप अफ कम्पनीले इटहरीमा टेनिड इष्टिच्यूट सञ्चालनमा ल्याएको हो।
सो इष्टिच्यूटको वैदेशिक रोजगार व्यवसायी संघका महासचिव नरेश गेलालले उद्घाटन गरे।
युवा जनशक्तिलाई सीपमूलक तालीम प्रदान गरेर दक्ष जनशक्ति उत्पादन गर्न तालीम केन्द्र सञ्चालनमा ल्याएको इष्टिच्यूटका सञ्चालक पुष्प ओलीले बताए।
सो इष्टिच्यूटमा मेसन, सटरिड, कार्पेन्टर, स्टिल फिक्सर, स्काफोल्डर, इलेक्टिसियन, प्लम्बर, एसी टेक्निसियनलगायतका तालीम प्रदान गरिने इष्टिच्यूटका प्रबन्ध निर्देशक गणेश ओलीले बताए।
उद्घाटन कार्यक्रममा बोल्दै महासचिव गेलालले यस्ता तालीम केन्द्रबाट सीप सिकेर सकेसम्म स्वदेशमै रोजगारी गर्नुपर्ने र विदेश जाने नै भए सीप सिकेर सूचना लिएर मात्र जाऔँ भन्ने उद्देश्यले पनि आफूहरुले यस प्रकारको तालीम केन्द्र सञ्चालनमा ल्याउन जरुरी रहेको बताए।
उनले मुलुक समृद्धिको दिशामा अघि बढ्न, समाज र समाजमा बस्नेहरु स्वाभिमानका साथ आत्मनिर्भर बन्नका लागि स्वरोजगारको सवाल प्रमुख भएको बताए।
स्वरोजगार बन्ने उद्देश्यले नै नेपालका लाखौँ युवा दैनिक खाडीमुलुकमा रगत पसिना बगाउन भौतारिरहेको बताउँदै गेलालले सीपको अभावमा उनीहरुमाथि श्रम शोषण समेत भइरहेको अवस्थामा यस्ता प्रकारका तालीम सेन्टर खुल्नु सुखद् भएको बताए।
राजनीतिक अधिकारको आन्दोलन सकिएकाले आर्थिक समृद्धिका लागि सीपयुक्त प्राविधिक जनशक्तिको आवश्यकता रहेको महासचिव गेलालको भनाइ छ।
अञ्जली गु्रपका अध्यक्ष भानु सिवाकोटीले वैदेशिक रोजगारमा दक्ष जनशक्तिको अत्यधिक माग रहेको बताउँदै तालीम सेन्टरलाई १ नम्बर प्रदेशको नमूना तालीम केन्द्र बनाउने बताए।
उनले तालीम केन्द्रहरुले असुरक्षित वैदेशिक रोजगारीमा जानेलाई सचेत गराउन सक्ने लक्ष्यका साथ अगाडि बढ्ने जानकारी दिए। वैदेशिक रोजगार व्यवसायी संघ सुनसरीका वरिष्ठ उपाध्यक्ष दुर्गा थापाले सीपमूलक व्यावसायिक तालीमले व्यक्तिलाई समृद्ध बन्न सहयोग पुर्याउनेमा जोड दिए।
यस्तै प्रबन्धक गणेशप्रसाद ओलीले तालीम केन्द्रले तालीम लिने युवालाई विशेष अवसर दिने बताउँदै तालीम लिइसकेपछि आफ्ना लागि र परिवारका लागि आवश्यक खर्च सजिलै जुटाउन सक्ने दाबी गरे। इटहरी–९ मा सञ्चालनमा ल्याइएको तालीम सेन्टरमा २० लाख रुपैयाँ लगानी रहेको ओलीले जानकारी दिए। रासस
