पानवारी । बुधबार विहानै आएको हावाहुरीले धरानका विभिन्न स्थानमा क्षति पुर्याएको छ ।
धरान–१७ स्थित नमुना सुन्दर बस्तीमा रहेको श्यामकुमार लिम्बूको कुखुरा फारमको छाना हावाहुरीले उडाउदा फारममा भएका करिब ८ सय कुखुरा मरेको छ । ८ सय कुखुरा मरेपछि लिम्बूको फारममा २ लाख भन्दा बढीको क्षति भएको इलाका प्रहरी कार्यालय धरानले जनाएको छ ।
त्यस्तै सोही बस्तीमा रहेका ८ वटा घरको छाना हावाहुरीले उडाएको छ । सुकमाया विकको सुकुम्बासी बस्तीमा रहेको ट्रष्टबाट बनाइएको घर हावाहुरीले ट्रष्ट सहित छाना उडाइदिएको छ । त्यस्तै राजकुमार चौधरी, माइला तामाङ, झरना राई, मुना श्रेष्ठ, कोपिला राई, सन्दीप राई लगायतको घरको छाना उडाएको धरान–१७ का वडाध्यक्ष मनोज भट्टराईले जानकारी दिएका छन् ।
