विजयपुर । गोरखाको चुम नुब्री गाउँपालिका–६ स्थित सिरिङ्ग्रे हिमालमा गएको हिमपहिरोपछि बुढीगण्डकी नदीमा आएको बाढीले ६५ वटा छाप्रा क्षतिग्रस्त बनाएको छ ।
बाढीमा परेका १८ जनाको सकुशल उद्धार गरिएको नेपाल प्रहरीले जनाएको छ । घटनामा हालसम्म मानवीय तथा चौपायाको क्षति भएको छैन । बाढीले सवारीसाधन आवतजावत गर्न मिल्ने एउटा मोटरेबल पुलसमेत भत्काएको छ, जसका कारण स्थानीय आवागमन प्रभावित भएको छ ।
प्रहरीको विवरणअनुसार घटनामा हालसम्म कुनै मानवीय तथा चौपायाको क्षति भएको जानकारी छैन । यद्यपि, हिमपहिरो र त्यसपछि आएको बाढीका कारण प्रभावित क्षेत्रका बासिन्दामा जोखिम बढेको छ ।
घटनालगत्तै नेपाल प्रहरीलगायतका सुरक्षा निकाय उद्धार तथा राहत कार्यमा परिचालित भएका छन्। प्रभावित क्षेत्रमा थप सतर्कता अपनाइएको छ भने क्षतिको थप विवरण संकलन तथा आवश्यक राहत व्यवस्थापनको काम भइरहेको छ।
सम्भावित थप बाढी तथा अन्य जोखिमलाई मध्यनजर गर्दै नदी आसपासका बासिन्दालाई सतर्क रहन र सुरक्षा निकायको निर्देशन पालना गर्न अनुरोध गरिएको छ।
