संखुवासभा । कोरोना भाइरस कोभिड १९ का कारण लकडाउन गरिएपछि संखुवासभामा असुरक्षित गर्भपतन गराउनेको संख्या बढेको छ । लकडाउनका कारण सुरक्षित गर्भपतन गराउन स्वास्थ्य संस्थासम्म आवत जावत गर्न समस्या तथा सेवा प्रदायक संस्थाहरुबाट सेवा बन्द गरिएपछि असुरक्षित गर्भपतन गराउनेको संख्या बढेको हो ।
गत फागुन ११ गते देखि यता चार जनाले गर्भपतनकालागी औषधी प्रयोग गरेर समस्या परेपछि जिल्ला अस्पताल खाँदबारीमा आएका थिए । अस्पतालको जानकारी अनुसार फागुन १२, २० र २३ गते विभिन्न स्थानका ४ जना महिलाले असुरक्षित गर्भपतन गराएपछि समस्या लिएर अस्पताल आएका थिए । उनीहरुले गर्भपतनकालागिऔषधी प्रयोग गरेको तर समस्या भएपछी अस्पताल आएको हुनसक्ने जनाइएको छ । तर लकडाउनका कारण आवत जावतमा समस्या भएकाले सुरक्षित गर्भपतन सेवा लिनेको संख्या घटेको र असुरक्षित तर्फ संख्या बढेको हुनसक्ने खाँदबारी अस्पतालका अनमी राधिका बस्नेतले जानकारी दिए ।
खाँदबारी जिल्ला अस्पतालमा मात्रै २०७६ साउन महिना देखि फागुन मसान्त सम्ममा ३ सय ६८ जनाले सेवा लिएका छन् । मासिक रुपमा यो सेवालिनेको औषत संख्या हेर्ने हो भने ४६ जना रहेका छन् । तर फागुन महिनामा ३३ जना महिलाले जिल्ला अस्पतालबाट सेवा लिएका छन् । लकडाउन पछि सुरक्षित गर्भपतन सेवा लिनेको संख्या २८ प्रतिशतले घटेको तथ्यांकले देखाएको छ ।
तथ्यांकको आधारमा नै हेर्ने हो भने २८ प्रतिशतले असुरक्षित गर्भपतन गराउनेको संख्या बढेको सुरक्षित गर्भपतन सेवा सम्बन्धी कार्यक्रम गरिरहेका सेसोडेकका कार्यक्रम अधिकृत कमानसिंह राईले बताए ।
संखुवासभामा सुरक्षित गर्भपतन सेवा सम्बन्धीआइपास नेपाल, समाज विकास केन्द्र सोडेक र स्वास्थ्य संस्थाहरुले काम गरिरहेको छ । सोडेकको तथ्यांकअनुसार २०७४/०७५ मा७ सय ५३ जनाले सुरक्षित गर्भपतन गराएका थिएभने ७५/७६ मा १२ सय ७ जनाले सुरक्षित गर्भपतन गराएका थिए ।
