पाँचथर । पाँचथरको तुम्बेवा गाउँपालिकामा जारी प्रथम तुम्बेवा अध्यक्ष कप खुल्ला फुटबल प्रतियोगिताको तेस्रो दिनको खेलमा राजघाट स्पोर्टिङ क्लब मोरङ र आयोजक तुम्बेवा गाउँपालिका सेमिफाइनलमा प्रवेश गरेका छन् ।
इन्द्राणी मा.वि.को खेलमैदानमा भएको क्वार्टर फाइनलको खेलमा सुदाप फुटबल क्लब धनकुटालाई ०–२ गोलले हराउँदै आयोजक तुम्बेवाले सेमिफाइनलको यात्रा पक्का गरेको छ ।
त्यस्तै अर्को खेलमा कुम्मायक गाउँपालिकालाई १–५ गोलको फराकिलो अन्तरले हराउँदै राजघाट मोरङले सेमिफाइनलको यात्रा सुरक्षित गरेको छ ।
प्रतियोगिताको पहिलो खेलमा मुनलाइट स्पोर्टिङ क्लब फिदिमलाई १–० गोलको अन्तरले हराउँदै इन्द्राणी मा.वि. तुम्बेवा क्वार्टर फाइनलमा प्रवेश गरेको छ भने भुलभुले सामुदायिकलाई ४–१ गोलको अन्तरले हराउँदै माउन्टेन युथ क्लब क्वार्टर फाइनलमा प्रवेश गरेको छ । प्रतियोगिताको उत्कृष्ट खेलाडीलाई नगदसहित मेडल र प्रमाण–पत्र प्रदान गरिएको थियो ।
अध्यक्ष कप प्रतियोगिता वैशाख ११ गतेदेखि १५ गतेसम्म सञ्चालन हुनेछ् । प्रतियोगिताको विजेता टिमले नगद २ लाख २ हजार २ सय २२ रुपैयाँ, ट्रफी, मेडल र प्रमाण–पत्र प्राप्त गर्नेछ । उपविजेता टिमले १ लाख ११ हजार १ सय ११ रुपैयाँ, ट्रफी, मेडल र प्रमाण–पत्र हात पार्नेछ भने तेस्रो हुने टिमले नगद ३३ हजार ३ सय ३३ रुपैयाँ, ट्रफी, मेडल र प्रमाण–पत्र प्राप्त गर्नेछ ।
