विराटनगर । भुजेल भाषा र लिपि नामक पुस्तक विमोचन गरिएको छ । भुजेल समाज सेवा समिति विराटनगर महानगरपालिकाले विराटनगरमा एक कार्यक्रम आयोजना गरी उक्त पुस्तक विमोचन गरेको हो ।
विराटनगर महानगरपालिकाका नगरप्रमुख नागेश कोइरालाले सो पुस्तकको विमोचन गरे । विराटनगर महानगरपालिका समितिका अध्यक्ष गोपाल भुजेलको सभापतित्वमा भुजेल भाषा, लिपि संस्कार र संस्कृतिका अध्येता लक्ष्मण थुसिरोङ भुजेलबाट सङ्कलित सो पुस्तक विमोचन कार्यक्रममा डिग्री क्याम्पसका क्याम्पस प्रमुख ढकबहादुर मगर,विराटनगर महानगरपालिका वडा नं. १६ का वडाध्यक्ष उद्धवकुमार भुजेल, समाजका केन्द्रीय समितिका वरिष्ठ उपाध्यक्ष राजकुमार भुजेल, संस्थापक केन्द्रीय सचिव पूर्णबहादुर भजेल (क) कोशी प्रदेश समितिका कोषाध्यक्ष एवम् विराटनगर महानगरपालिका समितिका संरक्षक इन्द्रबहादुर भुजेललगायतले शुभकामना मन्तव्य व्यक्त गरेका थिए ।
