भद्रपुर । झापाको बुद्धशान्तिमा बोलेरो र अटो ठोक्किँदा एकजनाको मृत्यु भएको छ भने तीनजना घाइते भएका छन् ।
सोमबार बिहान पौने ११ बजे बुद्धशान्ति –४ हापेन चोकस्थित मेची राजमार्गमा चारआलीबाट इलामतर्फ जाँदै गरेको प्रदेश १–०१–००१ ज ३८५१ नम्बरको बोलेरो गाडी र विपरीत दिशाबाट आउँदै गरेको प्रदेश १–०१–००२ ह ३६३ नम्बरको अटो एक आपसमा ठक्कर खाई दुर्घटना भएको जिल्ला प्रहरी कार्यालय झापाले जनाएको छ ।
दुर्घटनामा अटोमा सवार बुद्धशान्ति–४ का २१ वर्षीया कृतिका तामाङ, सोही ठाउँ बस्ने २७ वर्षीया अमृता तामाङ, ४१ वर्षीया मन्जु तामाङ र बोलेरो चालक मेचीनगर नगरपालिका–१२ का ४० वर्षीय दिलकुमार माझी घाइते भएको जिल्लाका डिएसपी कृष्णकुमार चन्दले जानकारी दिए ।
घटनापछि घाइतेहरूलाई सिटी अस्पताल बुधबारेमा उपचारका लागि लगिएको थियो । त्यहाँबाट थप उपचारको लागि प्रादेशिक अस्पताल भद्रपुर पठाएकोमा अस्पताल पु¥याउनासाथ चिकित्सकले अमृतालाई मृत घोषणा गरेको उनले जनाए । दुवै गाडी र अटो चालक बुद्धशान्ति–४ का ५३ वर्षीय अजय मोक्तान इलाका प्रहरी कार्यालय बुधबारेको नियन्त्रणमा रहेको उनले जानकारी दिए ।
