भद्रपुर / लागूऔषध कारोबारीलाई पक्राउ गर्ने क्रममा झापामा प्रहरीले गोली चलाएको छ । प्रहरीको गोली लागेर एक भारतीय लागूऔषध कारोबारी घाइते भएका छन् । झापाको कनकाई नगरपालिका–४ स्थित सुरुङ्गामा लागूऔषध कारोबारी पक्राउ गर्न खोज्दा प्रहरीमाथि आक्रमण गरेपछि प्रतिकारमा गोली चलाएको जिल्ला प्रहरी कार्यालय झापाका डिएसपी कृष्णकुमार चन्दले जानकारी दिए ।
प्रहरीले दिएको जानकारी अनुसार मङ्गलबार साँझ प्रहरीले पाँच राउन्ड गोली चलाएको हो । कनकाईमा दुईजनाले लागूऔषध लुकाएर राखेको भन्ने खबर पाएपछि इलाका प्रहरी कार्यालय सुरुङ्गा र लागूऔषध नियन्त्रण ब्युरो काँकडभिट्टाको संयुक्त टोलीले पक्राउ गर्न पुगेका थिए । त्यस क्रममा उनीहरू भागेपछि खेदाउने क्रममा प्रहरीले गोली चलाएको थियो । तर पनि भागेपछि दुई राउन्ड गोली हानेर लागू औषधसहित दुई भारतीय नागरिकलाई प्रहरीले पक्राउ गरेको हो । एक जनाको खुट्टामा दुई वटा गोली लागेको छ । दुवै जनालाई पक्राउ गर्न प्रहरी सफल भएको छ ।
पक्राउ पर्नेहरूमा भारत डिघलबैंकका अन्जार आलम र उनका भाइ युसुफ आलम रहेका छन् । एक जनालाई नियन्त्रणमा लिएको र अर्का घाइतेलाई उपचारका लागि कनकाई नगर अस्पतालमा पछि थप उपचारका लागि बी एण्ड सी अस्पताल बिर्तामोडमा भर्ना गरिएको प्रहरीले जनाएको छ । उनीहरूको साथबाट ३५ ग्राम ब्राउन सुगर बरामद भएको जनाइएको छ ।
