धरान । कोशी प्रदेशस्तरीय ‘कोशी प्रोभिन्स प्रिमियर लिग’ आयोजक संस्था कोशी प्रदेश फुटबल सङ्घले बुधबार आय–व्यय सार्वजनिक गरेको छ ।
धरान रङ्गशालामा गत माघ २८ गतेदेखि फागुन ८ गतेसम्म आयोजना भएको प्रतियोगिताबाट आयोजकले करिब ७ लाख रुपैयाँ खुद आय गर्न सफल भएको छ । आय–व्यय सार्वजनिक गर्दै कोषाध्यक्ष आनन्द चौधरीले भने, ‘आयतर्फ ३६ लाख ६७ हजार रुपैयाँ भयो भने व्ययतर्फ २९ लाख ८० हजार रुपैयाँ भयो । ६ लाख ८७ हजार रुपैयाँ खुद आय भएको छ ।’ यस्तै अखिल नेपाल फुटबल सङ्घ (एन्फा)मार्फत् फुटबलको सर्वोच्च निकाय फिफाबाट २ लाख रुपैयाँ आउन बाँकी रहेको उनले जानकारी दिए ।
प्रदेश अध्यक्ष किशोर राईले कोशी प्रदेश सरकारबाट २० लाख रुपैयाँ, अखिल नेपाल फुटबल सङ्घबाट १५ लाख रुपैयाँ, गोर्खा ब्रुअरी र रेडबुलबाट ५०–५० हजार, धरानका पूर्व अग्रज खेलाडीहरूबाट ३७ हजार र अन्य सहयोगी दाताबाट ३० हजार रुपैयाँ आय भएको उल्लेख छ । यहाँ गेटबाट सङ्कलित रकम भने उल्लेख गरिएको छैन ।
यस्तै खर्चतर्फ विजेताहरूलाई पुरस्कारमा ७ लाख ६५ हजार, पहाडी जिल्लाका क्लबहरूलाई थप सेवा ४ लाख २० हजार र तराई जिल्लाका क्लबहरूको विशेष तयारीका लागि २ लाख रुपैयाँ खर्च भएको जनाएको छ । कोशी प्रदेशका ११ वटा जिल्ला च्याम्पियनहरूबीच लिगकम नकआउटका आधारमा प्रतियोगिता गरिएको थियो । त्यसमध्येबाट विजेताहरू दुई टिमले प्रदेशस्तरीय लिगमा सहभागी हुन पाउने र त्यहाँबाट पनि विजेता भएमा राष्ट्रियस्तरको प्रतियोगितामा सहभागी हुन सक्ने जनाएको छ ।
‘राष्ट्रिय लिग खेलाउनै पर्छ, यस विषयमा यही २६ गते काठमाडौँमा एन्फाको मिटिङ छ । त्यहाँ यो विषयमा कुरा उठाउँछु’ –प्रदेश अध्यक्ष राईले भने । उनले एन्फाबाट सहयोग नआउँदा पनि प्रदेश क्लबले ४२ लाख रुपैयाँको कारोबार गरेको बताए । उनले प्रादेशिक लिग पनि खेलाउन सक्ने जनाए । त्यसका लागि व्यापक छलफलको आवश्यकता रहेको बताए ।
