धरान / स्कुले जीवन जस्तो एकल शोलो एल्बम बजारमा ल्याइसकेकी खोटाङ दिप्लुङ १ की मीना राईले ‘शीरैमा शीरफूल’ बोलको म्युजिक भिडियो सार्वजनिक गरेकी छन् ।
चारदिन अघि मात्रै सार्वजनिक गरेको यो गीत अहिले युट्युवमा हेर्न सकिन्छ । सङ्ग्स नेपालले युट्युवमा अपलोड गरेको यो गीत लोकआधुनिक रहेको छ । जसमा नेपाली लोक परम्परा र सँस्कृतिको कुराहरुलाई अटाइएको छ । रमेश राईको निर्देशनमा बनेको यो गीतको भिडियो काठमाडौंको त्रिभुवन पार्कमा छायांकन गरिएको छ ।
गीतमा शान्ता राई र किशोर राईले अभियन गरेका छन् भने विर्सना राई अतिथि पात्रका रुपमा छिन् । स्कुले जीवनबाट चर्चा कमाएकी मीनाले दर्शक र स्रोताको उपहार स्वरुप यो म्युजिक भिडियो निकालिएको बताउँछिन् । स्रोताहरुको अपेक्षालाई ध्यानमा राख्दै निकालिएको म्युजिक भिडियोलाई मीनाले चाडै नै कलेक्सन गर्दै एल्बमको रुपमा ल्याउने तयारीमा लागेको बताएकी छन् ।
अहिले संगीतको शिक्षा लिइरहेकी राईले यस अघि पदम खालिङसँग सन् २०१४ मा भोजपुर डबलीमासमेत स्वर दिएकी छन् । उनको आधाजीवन–२ मासमेत स्वर सुन्न सकिन्छ । हाल काठमाडौंमा डा. किरातबाट संगीत सिकिरहेकी उनले संगीतबाटै अघि बढ्ने सोच राखेको सुनाउँछिन् ।
