झण्डै १ बर्ष भयो नायक आर्यन सिग्देललाई दर्शकहरुले ठूलो पर्दामा देख्न नपाएको । गएको बर्ष चलचित्र ‘क्लासिक’ रिलिज भएपछि उनका अन्य चलचित्रहरु हलमा लागेका छैनन् । केही बर्ष अगाडीसम्म महिनामा तीनवटासम्म चलचित्रहरु हलमा लाग्ने आर्यनका अहिले बर्षदिन नाघ्दा पनि कुनै चलचित्र हलमा नलाग्नुले यो प्रश्नको उत्तर उनका फ्यानहरु पनि खोजिरहेका छन् कि, ‘आर्यन किन सुस्ताउँदै छन् ?’
लभस्टोरी चलचित्रमा सबैभन्दा बढी रुचाइएका नायक आर्यनले ‘क्लासिक’ रिलिजपछि अब आफ्नो होम प्रोडक्शन बाहेकका चलचित्रभन्दा बाहिर काम नगर्ने घोषणा गरेका थिए । तर, एक बर्षदेखी ठूलो पर्दाबाट टाढा रहँदा यति बेला उनको विषयमा अनेकथरी गसिपहरुले नेपाली सिनेवृत तात्दै आएको छ ।
कतै आर्यनको स्टारडम सकियो त कतै आर्यनलाई निर्माताहरुले नपत्याएको खबरहरु बाहिर आउँदै गर्दा केही दिन अगाडी आर्यनले चलचित्र ‘ईण्डलेस लभ’ साइन गरेको खबर पनि बाहिरिएको थियो । निर्देशक सजन श्रेष्ठसँग आर्यनले स्क्रिप्ट बोकेको तश्वीर बाहिर आएपछि यस्तो हल्ला चलेको थियो बजारमा । तर, यस विषयमा अहिलेसम्म निर्माणपक्षले भने कुनै जानकारी दिएको छैन ।
हालैमा आर्यनले आफ्नो आधिकारीक फेसबुक एकाउण्टमा भने एक तश्वीर पोष्ट गरेका छन् । तश्वीरमा उनले कुनै क्याप्सन लेखेका छैनन् तर उनको गालामा बढेको दाह्रीले भने कतै आर्यन चलचित्रको तयारीमा त छैनन् भन्ने कौतुहलता निम्ताउँछ । यो त उनैलाई थाहा होला कि आर्यन चलचित्रको तयारीमा छन् वा छैनन् तर एकबर्षसम्म नेपाली चलचित्रमा नदेखिँदा दर्शकहरु भने आर्यनको चलचित्र हेर्न लालहित भइसकेका छन् ।
