एजेन्सी/ रुसमा हुने २०१८ को विश्वकपमा अर्जेन्टिना सिधै छनोट हुन असफल भएको छ । शक्रबार विहान विश्वकप अन्तर्गत दक्षिण अमेरिकी देशको छनोटमा पेरुसँग गोलरहित बराबरी खेलेसँगै विश्वकपमा स्थान बनाउन नसकेको हो ।
अर्जेन्टिनाले अब विश्वकपमा स्थान बनाउनका लागि प्लेअफ खेल खेल्नुपर्ने हुन्छ । २०१४ को विश्वकपको उपविजेता बनेको अर्जेन्टिना विश्वकप छनोटको कठिन मोडमा पुगेको छ । विश्वकपमा स्वतः स्थान बनाउनका लागि अर्जेन्टिनाले पेरुलाई पराजित गर्नै पर्ने थियो । तर घरेलु मैदानमा नै अर्जेन्टिना पेरुसँग गोलरहित बराबरी खेल्न पुगेको हो ।
घरेलु भूमि इस्टाडियो अल्बेर्टोमा भएको खेलमा सुरुवाती समयदेखि नै अर्जेन्टिनाले आफ्नो पकड जमाए पनि गोल गर्न सकेन । अर्जेन्टिनाले पाएको राम्रो अवसरलाई सदुपयोग गर्न सकेन । खेलको अधिकांश समयमा अर्जेन्टिनाले बल नियन्त्रणमा लिएको थियो । पहिलो हाफमा गोलरहित बराबरी खेलको अर्जेन्टिनाले दोस्रो हाफमा पनि बराबरी खेल्दै अंक बाड्न पुग्यो ।
