माघ । स्पेनिस जायन्ट रियल म्याड्रिड कोपा डेल रेको क्वार्टर फाइनलबाटै बाहिरिएको छ । लेगानेससँग अवे गोलमा पराजित भएपछि रियल म्याड्रिडको यात्रा रोकिएको हो । घरेलु मैदान सान्टियागो बर्नाबाउमा भएको दोस्रो लेगमा लेगानेसले रियल म्याड्रिडलाई २–१ गोलले स्तब्ध बनायो ।
यसअघि लेगानेसको मैदानमा भएको पहिलो लेगमा रियल १–० ले विजयी भएको थियो । समग्रमा खेल २–२ गोलको बराबरी बराबरी भएपनि लगानेसले सान्टियागो बर्नाबाउमा गरेको दुुई गोलका कारण कापा डेल रेको सेमिफाइनलमा स्थान बनाउन सफल भएको हो ।
क्रिष्टियानो रोनाल्डो सहित अन्य केही नियमित खेलाडी बिना नै लेगानेस विरुद्ध उत्रिएको रियल म्याड्रिड ३१ औं मिनेटमा पछि परेको थियो । जावी इरासोको लामो प्रहार गोलमा परिणत हुँदा लेगानेसले पहिलो हाफ अघि सोही अग्रता कायम राखेको थियो ।
४७ औं मिनेटमा करिम बेन्जेमाले गोल गर्दै खेल बराबरीमा ल्याए । तर बेन्जेमाको बराबरी गोल लामो समयसम्म कायम रहन सकेन । ५५ औं मिनेटमा इरासोको पासमा ग्याब्रियल पाइसेसको हेडर गोल पाहुना टोलीको जितमा निर्णाक बन्न पुुग्यो ।
