आफ्नै मजदुरले हेम्मरले आक्रमण गर्दा व्यवसायी पवन अग्रवाल गम्भीर

धरान/धरानका एक प्रतिष्ठित व्यवसायीलाई बिहीबार आफ्नै कामदारले टाउँकोमा हेम्मर प्रहार गरी गम्भीर घाइते बनाएका छन् । व्यवसायी पवनकुमार अग्रवाललाई धरान–१८ क्याम्पगेट अघि निर्माणाधिन भवनमा कार्यरत एक मजदुरले हेम्मर प्रहार गरेका हुन् । हेम्मर प्रहारबाट अग्रवाल गम्भीर घाइते बनेका हुन् । उनको तत्कालै बीपी कोइराला स्वास्थ्य विज्ञान प्रतिष्ठानमा उपचार हुन नसकेपछि विराटनगरको न्युरो अस्पतालमा लगिएको छ । घटना करिव एक बजेतिरको हो । निर्माणाधिन घरमा कार्यरत धरान–१६ नौलोवस्तीका ५३ वर्षीय मजदुर नविन गिरीले हेम्मर प्रहार गरेका हुन् । उनी हाल फरार रहेको इलाका प्रहरी कार्यालय धरानका डिएसपी रामेश्वर पौडेलले जानकारी दिए । हेम्मर प्रहारबाट अग्रवालको करिव २ इन्च जति गहिरो घाउ भएको छ । उनको अवस्था गम्भीर रहेको परिवार स्रोतले जनाएको छ ।