बेनिशाको ‘ब्लाइन्ड रक्स’ ट्रेलर रिलिज

दृष्टिविहीन युवती सृष्टि केसीको जीवनमा आधारित भएर निर्माण भएको बायोपिक फिल्म ‘ब्लाइन्ड रक्स’ को ट्रेलर सार्वजनिक भएको छ । मंगलवार राजधानीमा एक कार्यक्रमका बीच कलाकार र निर्माण यूनिटको उपस्थितिमा सृष्टिको जीवन संघर्षको कथा बोल्ने फिल्मको ट्रेलर सार्वजनिक गरियो ।

नायिका बेनिशा हमालले पर्दामा सृष्टिको भूमिका निर्वाहा गरेकी छिन् । फिल्ममा अर्पण थापा, गौरी मल्ल, अनिल शाह, बसन्त भट्टको समेत मुख्य भूमिका छ । लन्डन प्रदर्शनपछि निकेश लिम्बु निर्मित यो फिल्म फागुन १८ गतेबाट देशव्यापी प्रदर्शनमा आउँदैछ ।

ट्रेलर रिलिज कार्यक्रममा बोल्दै नायिका बेनिशाले आफ्नो लागि ‘ब्लाइन्ड रक्स’ मा सृष्टिको भूमिका न्यायपूर्वक निर्वाहा गर्नु चुनौतीपूर्ण रहेको बताइन् । उनी भन्छिन्, ‘मेरो तर्फबाट शतप्रतिशत दिएको छु जस्तो लाग्छ । मेरो लागि यो भूमिकाले ठूलो अर्थ बोकेको छ ।’

यस्तै, निर्देशक मिलन चाम्सले ‘ब्लाइन्ड रक्स’ मा बेनिशाको अभिनय हेरेपछि सबैले तारिफ गर्ने बताए । उनले भने, ‘सायद हाम्रो टिम भाग्यमानी हो । बेनिशा जस्तो अभिनेत्री फिल्मले पायो ।’

एन फिल्मस क्रिएसन र चाम्स इन्टरटेनमेन्टको ब्यानरमा फिल्म निर्माण भएको हो । नवराज कृष्ण थापाको छायांकन, अर्जुन जिसीको सम्पादन रहेको फिल्मको कथा यम थापा र सुमन उप्रेतीले तयार पारेका हुन् ।