विराटनगर । ३८ सय किलो सुन तस्करी र उर्लाबारीको सनम शाक्या हत्या मुद्दामा चार जना प्रहरी अधिकारीसहित ९ जना अभियुक्तहरुले जिल्ला अदालत मोरङको आदेश विरुद्ध १७ नम्बरको लागि निवेदन दर्ता गरेका छन् ।
उच्च अदालत विराटनगरमा दायर भएको निवेदनमा मोरङ अदालतले गरेको आदेशको चित्त नबुझेपछि सादा तारिकमा छाड्न माग राख्दै उनीहरुले उच्च अदालतको १७ नम्बरको लागि निवेदन दर्ता गरेका हुन् ।
यसरी १७ नम्बर गर्नेमा पूर्व डिआइजी गोविन्द निरौला, निलम्बन एसएसपी दिवश लोहनी, एसपी विकासराज खनाल, डियसपी सन्जय कुमार राउत रहेको छन् । त्यस्तै हेमन्त गौतम, राजन थापा, पुण्यप्रसाद लामा, भूजुङ गुरुङ र सम्बीरप्रसाद तोलाङगेले १७ नम्बर गरेका छन् ।
अदालतको आदेश विरुद्ध अभियुक्तहरुले १७ नम्बरको लागि निवेदन दर्ता गराएपछि जिल्ला अदालत मोरङले उच्च अदालत विराटनगरलाई बिहीबार कैफियत प्रतिवेदन पठाएको छ । कैफियत प्रतिवदेनमा अभियुक्तहरुले दिएको बयान, घटना मुचुल्का, अदालतको आदेश रहनेछ । मुद्दाको सम्पूर्ण कैफियत प्रतिवेदनमा उच्च अदालतमा बुझाएपछि अदालतले पेशी तोक्ने छ । उच्च अदालतमा प्रत्येक हप्ताको बिहीबार मात्र पेशी हुने भएकोले १७ नम्बरमा निवेदन परेका अभियुक्तहरुको हकमा पनि आउँदो बिहीबार बहस हुने सक्ने एक जना कानुन व्यवसायीले बताए ।
उच्च अदालतमा हुने बहसको लागि वादीकोतर्फबाट उच्च अदालत विराटनगरका सहन्यायाधिवक्ता चिरञ्जीवी पराजुलीले बहस गर्ने बताइएको छ । बादी र प्रतिवादीको कानुन व्यवसायीहरुले बहस सुनेपछि न्यायाधीशले जिल्ला अदालतले गरेको आदेश हेरी प्रमाणको मुल्याकन गर्दा प्रतिवादी कसुरदार नदेखिएमा साधा तारिक वा धरौटीमा छाडने सक्ने अथवा जिल्ला अदालतले गरेको आदेलाई नै सदर गर्न सक्ने अधिवक्ता विकास थापाले जानकारी दिए ।
मोरङ अदालतका न्यायधीश नारयणप्रसाद शर्माले गएको जेठ ८ गते सुन तस्करी र हत्या प्रकरण मुद्दाका पक्राउ परेका ३० अभियुक्तमध्ये २८ जनालाई पुर्पक्षका लागि थुनामा पठाउने, एक जनालाई धरौटी र एक जनालाई सामान्य तारेखमा राख्ने आदेश दिएका थिए । पुर्पक्षको लगि झुम्का कारागारको थुनामा रहेका २८ अभियुक्त मध्धे ९ जनाले १७ नम्बरको लागि निवेदन दर्ता गरेका हुन् । उनीहरु विरुद्ध संगठित अपराध अन्तर्गत आपराधिक समूह स्थापना गरी सुन चोरी–पैठारी र निकासी गरेको, अपहरण तथा शरीर बन्धक र कर्तव्य ज्यान शीर्षकमा मुद्दा दर्ता भएको थियो ।
छुटेका दुई जना विरुद्ध सरकारी वकिलले १७ नम्बर गर्ने
जिल्ला सरकारी वकिलको कार्यालय विराटनगर मोरङले सुन तस्करी र उर्लाबारी सनम शाक्या हत्या प्रकरण मुद्दामा छुटेका दुई जना प्रतिवादीको हकमा १७ नम्बर गर्ने तयारी गरेको छ ।
जिल्ला अदालत मोरङले सादा तारिक र सामान्य धरौटीमा छाडेको भन्दै अदालतको आदेशविरुद्ध १७ नम्बरमा निवेदन दर्ता गर्ने भएको हो । सरकारी वकिलको कार्यालयले निलम्बन प्रहरी जवान विष्णुबहादुर खड्कालाई १५ हजार तथा प्रहरी हवल्दार अमरबहादुर थापालाई साधारण तारेखमा छाडेकोले सो आदेश बदर गरी सबै अभियुक्तलाई थुनामा राखेर मुद्दाको सुनुवाइ अघि बढाउन माग सहित १७ नम्बर गर्ने तयारी रहेको अदालत स्रोतले जानकारी दिएको छ ।
