चतरा । वराहक्षेत्रस्थित जडेज खेलमैदानमा जारी भरौल गोल्डकपको शुक्रबार सम्पन्न खेलमा फ्रेण्ड्स क्लबलाई पराजित गर्दै डाफिन्स क्यामरुन सेमिफाइनलमा प्रवेश गरेको छ ।
फ्रेण्ड्सलाई २–१ गोल अन्तरले पराजित गरेको डाफिन्सका तर्फबाट जर्सी नम्बर ८ लगाएर मैदानमा उत्रिएका म्यान अफ द म्याच नियले पहिलो हाफको पाँचौं मिनेटमा गोल गरे । पहिलो हाफकै २५ औं मिनेटमा फ्रेण्ड्सका तर्फबाट विदेशी खेलाडी जर्सी नम्बर १६ का सेराफेले गोल गर्दै खेललाई बराबरी बनाए ।
पहिलो हाफसम्म बराबर खेलेका दुवै टिमले प्रतिस्पर्धात्मक खेल प्रस्तुत गरेका थिए । दोस्रो हाफको ३० औं मिनेटमा जर्सी नम्बर १४ का क्यामरुनी खेलाडी पेटेङ्गाले गोल गर्दै डाफिन्सको जित सुनिश्चित गरेका थिए ।
चैत २७ गतेसम्म सञ्चालन हुने गोल्डकपमा शनिबारको खेल आयोजक न्यु स्टार क्लब वराहक्षेत्र र सरस्वती क्लब काठमाडौंबीच हुने आयोजकका भेषराज कार्कीले जानकारी दिए ।
