बिर्तामोड । गोर्खा ब्वाइज स्पोर्टिङ क्लब बुटवललाई २–१ गोल अन्तरले पराजित गर्दै मच्छिन्द्र क्लब झापाको झिलझिलेमा जारी तेस्रो सताक्षी गोल्डकपको सेमिफाइनलमा प्रवेश गरेको छ । जितसँगै मछिन्द्रले अन्तिम चारमा आफ्नो स्थान सुरक्षित गरेको छ । अब उसले फाइनल प्रवेशका लागि त्रिभुवन आर्मीको सामना गर्नेछ ।
भर्खरै सम्पन्न ए डिभिजन लिगको फाइनलमा मच्छिन्द्र क्लबले त्रिभुवन आर्मी क्लबलाई १–० ले हराउँदै उपाधि उचालेको थियो । सतासीधाम स्पोर्टिङ क्लबको आयोजनामा भएको खेलमा ए डिभिजन लिग विजेता मच्छिन्द्रले गोल्डकपमा सुखद् सुरुवात गरेको छ ।
खेलमा सुरुवाती अग्रता गोर्खा ब्वाइजले लिए पनि जित निकाल्न भने सकेन । खेलको १६ औँ मिनेटमा गोर्खा ब्वाइजका काजिम बुषारीले गोल गर्दै टिमलाई अग्रता दिलाए । उनले ओलाकेजीको पासलाई गोलमा परिणत गरेका थिए ।
मच्छिन्द्रले खेलको २५ औँ मिनेटमा खेललाई बराबरीमा फर्कायो । रञ्जित धिमालले गरेको कर्नर प्रहारलाई विदेशी खेलाडी आन्द्रेस निअले गोलमा परिणत गरिदिए । त्यस्तै, खेलको ३३ औँ मिनेटमा मच्छिन्द्रले अग्रता दोब्बर बनायो । सरोज योञ्जनको हातमा बलले छुँदा पाएको पेनाल्टीलाई मच्छिन्द्रका विमल घर्ती मगरले गोलमा परिणत गरे । खेलमा दुवै टिमले बिपक्षी पोष्टमा गरेको केही उत्कृष्ट प्रहार खेर गएका थिए ।
पहिलो हाफको सुरुवाती सयममा मच्छिन्द्रका विशाल राई ‘ए’ ले गरेको प्रहार फितलो हुँदा गोलमा परिणत हुन सकेन । खेलको २१ औँ मिनेटमा मच्छिन्द्रका विराज महर्जनको प्रहार गोल रक्षक सोजित गुरुङले सहजै बचाएका थिए । २४ औँ मिनेटमा गोर्खा ब्वाइजका ओलाकेजीको प्रहार बार नजिकैबाट बाहिएिको थियो भने ३९ औँ मिनेटमा काजिमको प्रहार फितलो रह्यो ।
७६ औँ मिनेटमा गोर्खा ब्वाइजको प्रहारलाई मच्छिन्द्रका विदेशी खेलाडी एडेलाजिया सोमिडेले हेडमार्फत उत्कृष्ट बचाउ गरे । बुधबारको खेलमा मछिन्द्रका विमल घर्तीमगर म्यान अफ द म्याच घोषित भए । उनले नगद १० हजार प्राप्त गरे ।
प्रतियोगिताअन्तर्गत बिहीबारबाट सेमिफाइनलका खेलहरु हुनेछ । सेमिफाइनलको पहिलो खेल आयोजक सतासीधाम स्पोर्टिङ क्लब झापा र थ्री स्टार क्लबबीच हुनेछ । क्वार्टर फाइनलमा आयोजकले मनाङ मस्र्याङ्दी क्लबलाई पराजित गरेको हो भने थ्री स्टारले बेलबारी फुटबल क्लब मोरङलाई पराजित गरेको थियो ।
