धरान । हिसान स्पोर्टस् मिटअन्तर्गत पुरुषतर्फको बास्केटबलमा ह्याट्रिक गर्न सफल एम्स एमेडेमीका विद्यार्थीलाई कलेजले आइतबार सम्मानित गरेको छ ।
कलेज परिसरमा एक कार्यक्रम गर्दै यस वर्षको पनि पुरुष बास्केटबलमा उपाधि जित्दै ह्याट्रिक गर्न सफल टिमका खेलाडीलाई सम्मानित गरिएको हो । शनिबार डिपो माविको बास्केटबल कोर्टमा सम्पन्न प्रतियोगितामा पुरुष बास्केटलमा हिमालयन स्कुललाई पराजित गर्दै उपाधि रक्षा गरेको हो ।
पहिलो र दोस्रो क्वार्टरमा पछाडि परेको स्थिति उल्टाउँदै विद्यार्थीहरूले धैर्यताका साथ खेल प्रस्तुत गरे त्यसले कलेजको गरिमालाई बढाएको व्यवस्थापन संकायका संयोजक दुर्गा सुवेदीले बताए । उनले खेलाडीहरूलाई धन्यवाद दिए । त्यसक्रममा शिक्षासेवी निकेतन विद्यालयका शिक्षक आशिस मास्केले खेलाडीहरूलाई जनही १ हजार रुपैयाँ प्रदान गरे । खेलाडीहरूको मनोबललाई उच्च राख्नका लागि प्रोत्साहन स्वरूप नगद प्रदान गरिएको शिक्षासेवी मास्केले बताए ।
कलेजका प्राचार्य मित्र तामाङ, शिक्षासेवी आशिस मास्केलगायत शिक्षकले विद्यार्थीहरूलाई हौसला प्रदान गर्दै सम्मानित गरिएको थियो ।
